Գոհար Սարգսյան, Sputnik.
2015 թվականի գարնանը Բաշինջաղյան փողոցի շենքերից մեկում տեղի ունեցած դժբախտ պատահարի մասին բնակիչները մինչ այսօր սարսուռով են հիշում: 35-ամյա կինը 11-րդ հարկում մտել էր վերելակ, որը պոկվել էր ու ընկել հորը:
«Այդ դեպքից հետո երկար ժամանակ խուսափում էի անգամ շքամուտք մտնել»,-ասաց բնակիչներից մեկն ու, խոսքը բերանում, թողեց ու հեռացավ՝ իրենից վանելով տխուր հիշողությունները:
Անգամ այս դեպքից հետո էլ Երևանում շարունակում են գործել անսարք վերելակները: Մայրաքաղաքում գրանցված 5469 վերելակից փորձաքննության է ենթարկվել ընդամենը 3864-ը, ընդհանուր թվի 71 տոկոսը: Վերելակների մի մասի դեպքում փորձագետների եզրակացությունը բացասական է եղել: Կան վերելակներ էլ, որոնք շահագործման պիտանի չլինելով հանդերձ, միևնույն է, չեն «կանգնում»: Սա խնդիր է, որն առայժմ լուծում չի ստանում:
«Փորձաքննությունից հետո կարգադրագիր է կազմվում և ուղարկվում շահագործողին՝ համատիրությանը, որտեղ հստակ նշված է, որ տվյալ արտադրական օբյեկտը պիտանի չէ շահագործման: Բայց բնակիչները չեն ցանկանում որոշ ժամանակ մնալ առանց վերելակի»,-ասում է ՏԿԱԻՆ-ի տեխնիկական անվտանգության ազգային կենտրոնի կարուսելների, շարժասանդուղքների ու վերելակների տեխնիկական անվտանգության բաժնի պետ Լուսինե Հովհաննիսյանը:
Մինչդեռ «Տեխնիկական անվտանգության ապահովման պետական կարգավորման մասին» ՀՀ օրենքն ասում է, որ ցանկացած վտանգավոր օբյեկտ տարեկան առնվազն մեկ անգամ պարտադիր կարգով պետք է ենթարկվի տեխնիկական անվտանգության փորձաքննության: Եթե վերելակը չի ստուգվում, տվյալ շենքի բնակիչները պետք է տուգանվեն: Բայց, մեր զրուցակցի խոսքով, ՏԿԱԻՆ-ը տուգանքի հարց չի բարձրացնում «բարեհոգի» լինելու պատճառով: Ի դեպ, վերելակների փորձաքննությունը վճարովի է:
«Ամեն վերելակի փորձաքննությունն արժե 2930 դրամ: Դա մեծ գումար չէ, որ ամեն տարի համայնատիրությունը մեկ անգամ վճարի»,-ասում է Լուսինե Հովհաննիսյանը:
Ի դեպ, վերլուծության ստացված արդյունքների համաձայն՝ ամենամեծ թվով անսարք վերելակները Դավթաշենում են՝ թվով 81: Մինչդեռ Քանաքեռ-Զեյթուն վարչական շրջանում փորձաքննության ենթարկված ոչ մի վերելակի բացասական եզրակացություն չեն տվել:
Լուսինե Հովհաննիսյանի ղեկավարած կառույցը նաև ուսումնասիրել է կարուսելների վիճակը:
«Երևանում տեղադրված 83 ատրակցիոնները ենթարկվել են փորձաքննության: 2-ը՝ «Զանգակն» ու «Բատուտը», բացասական եզրակացություն են ստացել, իսկ Շիրակի մարզում արգելվել է «Ամերիկյան բլուրները»,-ասում է Լուսինե Հովհաննիսյանը:
Պետք է նշել, որ եթե փորձագետը սխալ եզրակացություն է տվել, և կարճ ժամանակ անց կարուսելը պոկվել է, ապա այդ փորձագետին տույժ է հասնում նվազագույն աշխատավարձի 500-ապատիկի չափով:
Կարուսելների հետ կապված վերջին լուրջ դեպքը գրանցվել է 2010 թվականին: Երևանի «Հաղթանակ» զբոսայգում պոկվել էր «Թայֆուն» ինքնաշեն կարուսելի 4 տեղանոց սայլակը: Միջադեպի հետևանքով տուժած 4 քաղաքացիներից 2-ից տեղափոխել էին հիվանդանոցի վերակենդանացման բաժանմունք: Իսկ 2015 թվականի հոկտեմբերին լրատվամիջոցները հայտնեցին, որ պոկվել է «Ամերիկյան բլուրները» կարուսելը, ինչի հետևանքով թեթև վնասվածքներ էին ստացել պապն ու թոռը:
