Թողել է բիզնեսը, որպեսզի կռվի ահաբեկիչների դեմ
40-ամյա Սլիվիա Կուրին, ով սեփական բիզնեսն է ունեցել, թողել է գործը, որպեսզի միանա ժողովրդական աշխարհազորի գումարտակին, որը Հասաքե նահանգում պայքարում է «Իսլամական պետության» դեմ։
Sputnik-ին տված հարցազրույցում Սլիվիան ասել է. «Սեփական ժողովրդի հանդեպ մեծ սերը դրդել է ինձ թողնել փոքրիկ երեխաներիս ծնողներիս մոտ, որպեսզի մեր նահանգի մարտիկների հետ միասին պաշտպանեմ հայրենիքս։ Սիրիայում ահաբեկիչները 5 տարի շարունակ ոչ ոքի չեն խնայում, նույնիսկ երեխաներին, կանանց ու ծերերին։ Ահաբեկիչներին միայն մի բան է հետաքրքրում. «ում սպանել և բռնաբարել» և «ինչ քանդել ու կողոպտել»։ Ուստի ես որոշեցի զենք վերցնել ձեռքս»,- հավելել է Սլիվիան։
«Ես աղոթում եմ Աստծուն, որպեսզի խաղաղությունը վերահաստատվի մեր երկրում։ Շատ եմ կարոտում երեխաներիս, և սիրտս ցավում է դրանից։ Երազում եմ, որպեսզի երեխաներս մեծանան մի երկրում, որտեղ տիրում է խաղաղություն, սեր, բարեկամություն, որտեղ չկա ահաբեկչություն»,- ասել է Սլիվիան։
Հայրենիքը ոչնչի հետ չես փոխի
Սահար Բահնիան, ով 26 տարեկան է, պատմել է Sputnik-ին, որ ահաբեկիչները սպանել են իր ամուսնուն, որովհետև նա պետական պաշտոն է զբաղեցրել քաղաքապետարանում։ Դրանից հետո նա որոշել է հարել պաշտպանական ուժերի կանանց գումարտակին։
«Հայրենիքն անգին է։ Երբ մարդն ինչ-որ բան է կորցնում կամ ինչ-որ մեկին, ապա այդ կորուստը կարելի է լրացնել։ Բայց հայրենի երկրի կորուստը երբեք ոչնչով չես լրացնի։ Ուստի ես աջակցում են բոլոր աղջիկներին, ովքեր զենք են վերցնում` իրենց հայրենիքը պաշտպանելու համար։ Մենք ծնվել ու մեծացել ենք Սիրիայում, մենք կմնանք այստեղ ու կպայքարենք ահաբեկիչների դեմ»,- ասել է Սահարը։
Դեմքին միշտ ժպիտ է
Երիտասարդ Ռանիա Բուտրուսը, ով արդեն հասցրել է ամուսնանալ, որոշակի դժվարություններ է ունեցել, մինչև երկրի ժողովրդական աշխարհազորին միանալը։ Նրա ամուսինը կտրականապես դեմ է եղել, որպեսզի 19-ամյա կինը պատերազմի «Իսլամական պետության» դեմ, բայց երկար համոզելուց հետո համաձայնել է։
«Այո, դա դժվար է։ Բայց հայրենիքի հանդեպ սերն օգնում է մոռանալ բոլոր դժվարությունները և զենքի ծանրությունը։ Չնայած արյան մշտական հոտին և մահվան սպառնալիքին` մեր դեմքից չի անհետանում ժպիտը»,- բացատրել է Ռանիան։
Մարզանք ամեն առավոտ
30-ամյա Շիրուն, ով կռվում է ինքնապաշտպանության քրդական ջոկատում, Sputnik-ին պատմել է իրենց գումարտակի առավոտյան մարզումների մասին։
«Ինքնապաշտպանության շարքեր մտնելուց առաջ թեկնածուներն անցնում են մարզումներ, զորավարաժություններ և նույնիսկ տեսական ուսուցում, որոնք տեղի են ունենում ամեն առավոտ։ Մեր նպատակն է կանանց ֆիզիկական պատրաստվածությունը և ծանր ու թեթև զենքին տիրապետելու հմտությունը։ Մեր կանանց ջոկատները պատերազմում են ոչ միայն Այն ալ Արաբում (Քոբանի), այլ նաև բոլոր ճակատներում, որոնք գտնվում են թուրք-սիրիական սահմանին»,- ասել է Շիրուն։
