Անի Լիպարիտյան, Sputnik
Հայաստանի բնակիչները յուրաքանչյուր ամսվա 15-ին վճարում են կոմունալ ծառայությունների համար։ Սակայն եթե դա ժամանակին չարվի, ապա կարող ես մնալ առանց գազի, ջրի և էլեկտրաէներգիայի։
Այսօր փոստային բաժանմունքներում և բանկերում հերթեր են գոյանում։ Քաղաքացիները վճարում են կոմունալ ծառայությունների համար։
«Վճարում ենք։ Առանց դրա չի լինի։ Հիմա երեխաներիս հետ ապրում եմ Հայաստանում, ամուսինս Ռուսաստանում է։ Դա մեր կանանց համար սովորական պատկեր է, երբ ամուսինը բնակվում է օտար երկրում։ Նա ամիսը մեկ ինձ ոչ մեծ գումար է ուղարկում»,- ասում է Անահիտը։
Ամուսինը դադարել է Հայաստան «նորմալ» փող ուղարկելը Ռուսաստանում տնտեսական իրավիճակի վատացումից հետո։
«Ես, իհարկե, այստեղ նույնպես աշխատում եմ։ Ապրում ենք, ինչպես կարող ենք։ Լավ էր, որ ամուսինս Նոր տարուց առաջ փող ուղարկեց, այսօր կարող եմ վճարել կոմունալ ծառայությունների համար։ Սարսափելի է պատկերացնել, թե ինչ գումար է ինձ սպասում»,- հավելեց նա։
Հրանտը, ով կատարել է վճարումները, գոհ է, որ գումարը չի գերազանցել իր նախատեսած չափը։ «Իհարկե, ամենից շատ վճարում եմ գազի համար։ Բայց ոչինչ… ես աշխատում եմ, ուստի հասցնում եմ ժամանակին վճարել։ Իհարկե, ոչ ոք չի ուզում շատ փող վճարել, բայց ձմռանը գազի համար միշտ շատ ենք վճարում»,- խոստովանեց Sputnik Արմենիա պորտալի զրուցակիցը` նշելով, որ այս տարվա հաշիվն անցյալ տարվանից ավելի է։
Նա ցույց տվեց անդորրագիրը, որի վրա երևում էր գումարը` շուրջ 40 հազար դրամ (80 դոլար)։ Նշենք, որ Հայաստանի սպառողների համար 1 խորանարդ մետր գազի գինը կազմում է 156 դրամ (32 ցենտ), իսկ երկրում նվազագույն աշխատավարձը 50 հազար դրամ է (100 դոլար)։
Մյուս զրուցակիցս վախեցած էր, նա չցանկացավ ներկայանալ։
«Ես ընտանիքիս հետ ապրում եմ սեփական տանը։ Իսկ տանը նորածին երեխա ունենք։ Ինքներդ եք հասկանում, թե դա ինչ ծախս է… Տանը գազ չունենք, տաքանում ենք վառարանով»,- ասաց անծանոթը։
Նորան, ով նույնպես եկել էր բանկ` կոմունալ վճարումներ կատարելու, խոստովանում է, որ սա ամենավատ շրջանն է, քանի որ տոներից հետո գումար չի լինում։
«Հիմա շատերը sms-հաղորդագրություններ են ստանում սարսափեցնող թվերով։ Օրինակ` մարդը պետք է վճարի 60 հազար դրամ կոմունալ ծառայությունների համար, այնինչ նա քիչ աշխատավարձ է ստանում, ինչպես ես։ Հետո ի՞նչ է լինելու։ Վճարելու ես կոմունալ ծառայությունների համար, և վե՞րջ»,- նշեց նա։
Նա ուրախ է, որ եղանակը տաքացել է, դա նշանակում է, որ ջեռուցման ծախսերը կկրճատվեն։
