ԵՐԵՎԱՆ, 14 հունվարի — Sputnik. Pew Research Center-ի (PRC) տվյալների համաձայն` ԱՄՆ-ում իսլամ դավանող քաղաքացիների թիվը 2050 թվականին 3.3 միլիոնից կհասնի 8.1 միլիոնի և կկազմի երկրի ընդհանուր բնակչության 2.1 տոկոսը:
Ավելի վաղ նախագահի թեկնածու Դոնալդ Թրամփը հայտնել էր, որ պետք է արգելել մահմեդականների մուտքն ԱՄՆ: Տարածված հայտարարության մեջ ասվում էր, որ «Դոնալդ Թրամփը կոչ է անում ամբողջովին դադարեցնել մահմեդականների մուտքը ԱՄՆ մինչև երկրի ներկայացուցիչները չհասկանան` ինչ է կատարվում»:
«Մահմեդականների գաղթի վերաբերյալ վերջին քաղաքական բանավեճերը շատերին դրդեցին հարցնել, թե նրանց թիվը որքան է կազմում բնակչության ընդհանուր քանակում (2015 թվականին կազմում էր շուրջ 322 մլն): Պաշտոնական տվյալներ, ցավոք, չկան, քանի որ բնակչության հաշվառման ժամանակ կրոնական դավանանքի վերաբերյալ հարցում չի արվում», — ասվում է ուսումնասիրության մեջ:
Գիտնականների ստեղծած ժողովրդագրական մոդելը թույլ է տվել եզրակացնել, որ Նահանգներում մահմեդականների քանակը 35 տարվա ընթացքում 1 տոկոսից (2015 թվականի տվյալներ) կհասնի 2.1 տոկոսի:
