ԵՐԵՎԱՆ, 14 հունվարի — Sputnik. Վարչական իրավախախտում կատարած վարորդները, եթե ժամանակին վճարեն օրենքով սահմանված տուգանքը, կազատվեն տուգանքին ավելացված մասից ու կատարողական ծախսերից։
Խոսքը վերաբերում է մասնավորապես այն տուգանքներին, որոնք սահմանվել են 2012 թվականի հունվարի 1-ից մինչև 2015 թվականի հունվարի 9-ն ընկած ժամանակահատվածում։ Տուգանքները պետք է վճարել մինչև հուլիսի 11-ը։
«ՀՀ ԱՆ ԴԱՀԿ ծառայությունը տեղեկացնում է, որ 2012 թվականի հունվարի 1-ից մինչև 2015 թվականի հունվարի 9-ը կայացված վարչական ակտով նախատեսված տուգանքի գումարը մինչև սույն թվականի հուլիսի 11-ը վճարելու դեպքում վարչական իրավախախտում կատարած անձն ազատվում է վարչական ակտի ընդունման պահին գործող օրենքով սահմանված կարգով գումարը չվճարելու հետևանքով նախատեսված տուգանքի չափի ավելացված մասից և կատարողական ծախսերից, այսինքն՝ վճարում է միայն տուգանքի մայր գումարը։
2015 թվականի հունվարի 9-ից մինչև 2016 թվականի հունվարի 11-ը կայացված վարչական ակտով նախատեսված տուգանքի գումարը մինչև սույն թվականի հուլիսի 11-ը վճարելու (վճարված լինելու) դեպքում վարչական իրավախախտում կատարած անձն ազատվում է վարչական ակտի ընդունման պահին գործող օրենքով սահմանված կարգով գումարը չվճարելու հետևանքով նախատեսված տուգանքի չափի ավելացած մասը վճարելու պարտականությունից»,- նշված է ԴԱՀԿ հայտարարության մեջ:
