ԵՐԵՎԱՆ, 13 հունվարի — Sputnik. Sputnik Արմենիա ռադիոկայանին տված հարցազրույցի ժամանակ 15 տարի ԱՄՆ-ում ապրած 31-ամյա Նուր Մատտին բացատրում է, թե ինչպես է Դետրոյթի ավագ դպրոցն ավարտելուց հետո վերադարձել հայրենիք:
Այժմ Մատտին Էրբիլում է`Քրդստանում: Ըստ նրա, Քրդստանը տարբերվում է Իրաքի մյուս շրջաններից, որտեղ զգալի տարածքներ գտնվում են «Իսլամական պետություն» խմբավորման ազդեցության տակ:
DJ-ը հպարտանում է, որ Քրդստանում երկրորդ լեզուն այլևս ոչ թե արաբերենն է, այլ` անգլերենը: Նա նկատում է, որ այս շրջանում երիտասարդ սերունդը բաց է արևմտյան մշակույթի և անգլիալեզու երաժշտության համար: Այստեղ «տեղացի 15-ամյա աղջիկները «One Direction» խմբին երկրպագում են ճիշտ այնպես, ինչպես աշխարհի այլ ծայրերում ապրող ցանկացած 15-ամյա աղջիկ»:
«Մեր ուկնդիրը շատ տարբեր է. մեզ լսում են ամբողջ աշխարհից ժամանած արտասահմանցիները, երիտասարդ տեղացիները, ովքեր ավելի ժամանակակից և բաց հայացքների տեր մարդիկ են»,- նշում է Մատտին և ընդգծում, որ իր շոուն տեղացիներին օգնում է բարելավել անգլերենի իմացությունը, իսկ միջազգային ունկնդիրներին ներկայացնում է տարածաշրջանի ներկա իրավիճակի սեփական ընկալումը:
Նա բացատրում է, թե ինչու է իր անգլիալեզու շոուն հասարակության շրջանում այդքան տարածված. «Այն ապաքաղաքական է, պատերազմի մասին չէ և գրավում է մարդկանց, ովքեր հոգնել են «Իսլամական պետության» մասին լսելուց:
«Մենք ապրում ենք մի հասարակությունում, որտեղ մարդիկ 24 ժամ «Իսլամական պետության» մասին են խոսում: Մարդիկ մեզ հավանում են, քանի որ իրենք, կարծես, հոգնել են ամեն օր Իսլամական պետության մասին լսելուց, քանզի շրջապատված են ահավոր նորություններով, և հետևաբար հեշտ է մարդկանց ուշադրությունը գրավել՝ առաջարկելով մեկ րոպեով քաղաքականությունը մի կողմ դնել և որակյալ երաժշտություն ունկնդրել»:
Ըստ իրաքցի DJ-ի, իրենք խրախուսում են նաև տեղացի երաժիշտներին. «Մենք թույլ ենք տալիս, որ նրանք անվճար երաժշտություն ձայնագրեն, և, եթե համարում ենք, որ այդ երաժշտությունը կարող է ռադիոյով եթեր հեռարձակվել, ապա մենք դա անպայման խրախուսում ենք»:
Շոուի կազմակերպիչները ջանում են քրդական երաժշտությունը տարածել ամբողջ աշխարհում։
Մատտին կարծում է, որ լավ երաժշտությունը կօգնի երիտասարդ սերնդին ազատել «Իսլամական պետության» և այլ նմանօրինակ դաժան կրոնական արմատականների սպառնալիքից:
