ԵՐԵՎԱՆ, 13 հունվարի- Sputnik. «Ոսկե ազնվամորու» հավակնորդ ֆիլմերի ամբողջական ցուցակը ներկայացնում է The Washington Post-ը։
«Ոսկե ազնվամորին» կհանձնեն փետրվարի 27-ին` «Օսկարի» մրցանակաբաշխության նախօրեին։
Անվանակարգերի քանակով առաջատար է «Մոխրագույնի 50 երանգ» էրոտիկ դրաման, որը նկարահանվել է Է. Լ. Ջեյմսի համանուն վեպի հիման վրա։ Ֆիլմն առաջադրված է «Վատագույն ֆիլմ», «Վատագույն դերասան», «Վատագույն դերասանուհի», «Վատագույն դերասանական զույգ», «Վատագույն ռեժիսոր» և «Վատագույն սցենար» անվանակարգերում։
Ֆիլմն էկրան է բարձրացել 2015թ.-ի փետրվարին և ավելի քան 500 մլն դոլար եկամուտ ստացել` 40 մլն դոլար բյուջեի դեպքում։ Ֆիլմի շարունակությունը կներկայացվի 2017թ.-ին։
«Վատագույն ֆիլմ» անվանակարգում ներկայացված են նաև «Պիքսելներ» ֆանտաստիկ կատակերգությունը, քույր և եղբայր Վաչովսկիների «Յուպիտերի ծագումը», «Շոպո-կոպ 2» կատակերգությունը և «Ֆանտաստիկ քառյակ» ֆիլմը։
«Ոսկե ազնվամորին» հանձնում են 1980թ.-ից։ Մրցանակը հիմնել է լրագրող Ջոն Ուիլսոնը։
