ԵՐԵՎԱՆ, 13 հունվարի- Sputnik. Հայտնի ուկրաինացի երգչուհի Անաստասիա Պրիխոդկոն պատրաստվում է «Եվրատեսիլ 2016» մրցույթի ընտրական փուլին մասնակցել Free now երգով, որը գրել է հայ կոմպոզիտոր Շուշան Սարգսյանը։ Այս մասին գրում է ուկրաինական «День»-ը։
Շուշանի երաժշտության մեջ նրբորեն համադրվում են արևելյան և արևմտյան մոտիվները, ավանդական երանգները, ինչպես նաև նորարարությունը։ Նոր հնչեղություն գտնելու համար Շուշանը հաճախ է օգտագործում է անսովոր գործիքների ձայներ, որոնք հատուկ ստեղծված են նրա ստեղծագործությունների համար և գրագետ համադրվում են ավանդականի հետ։ Այդ նոտաներն ունկնդրին կհասցնի հայտնի բլուլահար Ավագ Մարգարյանը, ստեղծագործությունում օգտագործվելու է հայկական փողային հազվագյուտ գործիք` բլուլ։
Ավագ Մարգարյանը հանդես է գալիս համաշխարհային բեմերում, 2012թ.-ին նրա կատարումներով ձայնասկավառակը հեղինակավոր «Էդիսոն վորլդ» մրցանակի է արժանացել։
Free now երգի բառերը գրել է պոետ Նիկոլայ Բրովչենկոն։ Պրիխոդկոն խոստովանել է, որ Free now երգը ոգեշնչում է մարդուն, որ նա նոր նվաճումների հասնի և համարձակ քայլեր կատարի։
«Վաղուց էի երազում իմ երկիրը ներկայացնել այս հայտնի մրցույթում։ Ուզում եմ մարդկանց ջերմություն փոխանցել և անմիջական լինել։ Ունկնդիրները պետք է զգան այն բացարձակ անկեղծությունն ու սերը, որը կարող է ապրել կնոջ սրտում»,- ասում է Պրիխոդկոն։
2009թ.-ին Պրիխոդկոն արդեն մասնակցել է «Եվրատեսիլ» մրցույթին, բայց ներկայացրել է Ռուսաստանը։ Այդ մրցույթում նա զբաղեցրել էր 11-րդ տեղը։
Կոմպոզիտոր Շուշան Սարգսյանն ավարտել է Խարկովի կոնսերվատորիան։ Դեռ 2003թ.-ին Շուշանը հաղթել է «Սայաթ Նովա» երգի ազգային մրցույթում «Երկիր Հայաստան» երգով, որը մեծ համբավ է բերել կոմպոզիտորին։ Իսկ 2014թ.-ին նա գրել է «Ոսկե դարպասներ» երգը, որն Ուկրաինայի շատ քննադատներ ու ԶԼՄ-ներ երկրի ոչ պաշտոնական հիմն են անվանում։
