ԵՐԵՎԱՆ, 12 հունվարի — Sputnik. Հայաստանի ճանապարհային ոստիկանության աշխատակիցները մեկնաբանել են որոշ փոփոխություններ` կապված վարչական իրավախախտումների մասին օրենսգրքի նոր դրույթների հետ։
Հայաստանի ճանապարհային ոստիկանության իրավաբանական բաժնի պետ Արման Չիլինգարյանը պարզաբանել է, որ հունվարի 18-ից հարբած վիճակում մեքենա վարելու համար տուգանքները կավելանան եռակի։
«Նախկին 150 հազարի փոխարեն (310 դոլար) ոչ սթափ վարորդները կվճարեն 200 հազար դրամ (420 դոլար) տուգանք»,- ասաց Չիլինգարյանը։
Նրա խոսքով` փոփոխությունները կվերաբերեն այն վարորդներին, որոնց տրանսպորտային միջոցի դիմացի հողմապակիները թաղանթապատ են։ Այդ դեպքում վարորդը կտուգանվի 30 հազար դրամով (62 դոլար)։
Հաջորդ փոփոխությունը, որը դուր կգա վարորդներին, վարորդական իրավունքը 24 ժամվա ընթացքում ներկայացնելն է սկսած այն պահից, երբ ՃՈ աշխատակիցը պահանջել է այն ներկայացնել։
«Հաջորդ փոփոխությունը վերաբերում է ուղևորների` մեքենայից իջնելուն և բարձրանալուն։ Կանգառն այդ դեպքում խախտում չի համարվի, եթե տևում է մեկ րոպեից ոչ ավել»,- նշեց Չիլինգարյանը։
Նախօրեին Facebook-ի իր էջում նոր կանոնները պարզաբանել է նաև արդարադատության նախարար Արփինե Հովհաննիսյանը։ Մասնավորապես նա նշել է, որ նոր իրավական կարգավորումը հնարավորություն կտա ճանապարհային երթևեկության մի շարք խախտումների նկատմամբ կիրառել ոչ թե տուգանք, այլ նախազգուշացում։
