Արմենուհի Մխոյան, Sputnik.
ԵՐԵՎԱՆ, 12 հունվարի — Sputnik. Նույնիսկ այն, որ յոթ հոգանոց ընտանիքի սպանության մեջ մեղադրվող Գյումրիում տեղակայված ՌԴ 102-րդ ռազմակայանի N զորամասի տանկային գումարտակի 1-ին տանկային վաշտի ժամկետային զինծառայող Վալերի Պերմյակովն արդեն դատապարտվել է ՌԴ քրեական օրենսգրքի երեք հոդվածով նախատեսված՝ «դասալքություն», «զենքի հափշտակում» և «զենքի ապօրինի կրում» մեղադրանքներով, և արդեն մեկնարկել է Վալերի Պերմյակովի նկատմամբ հայկական կողմի դատավարությունը, սա գյումրեցիների կարծիքով լույս չի սփռում իրականության վրա: Նրանցից շատերը չեն հավատում, որ երբևէ իրականությունը կպարզվի:
«Դեպքն արտառոց էր, և տրամաբանական ոչ մի վերլուծության չի ենթարկվում և՛ զինվորի պահվածքով, և՛ սպանության դրդապատճառով, և՛ առավել ևս ռուսական ռազմակայանի համատեքստում: Ամեն ինչ «տակնուվրա» վիճակում է: Իմ` հասարակ քաղաքացու համար ոչինչ պարզ չէ: Անչափ անհասկանալի ու շատ մութ հարցեր կան, ավելին` համոզված եմ, որ մենք իրական պատճառն ու հանցագործության տեսակն ու կազմը չենք իմանա: Պարզապես մարդկային առումով զգում ես, որ այդ «արարածը» չէր կարող այդ հանցանքը գործել, առավել ևս հիմա էլ պարզվեց, որ սատանիստ է: Հույս ունենք, որ դատավարության ընթացքում ինչ-որ հանգամանքների վրա լույս կսփռվի: Պատժամիջոցի մասին խոսելն անգամ ավելորդ է, բայց անչափ կարևորում եմ սա՝ նաև իմանալու համար, թե ինչ ուժի հետ գործ ունենք զգոն լինելու, հետագայում նմանատիպ դեպքերը կանխելու նպատակով»,-նշում է երաժշտագետ Հասմիկ Հարությունյանը:
Շատ գյումրեցիների կարծիքով, եթե իրոք դեպքը տեղի է ունեցել Վ. Պերմյակովի կողմից, և այս պահին խոսվում է Պերմյակովի՝ սատանայական խմբի անդամ լինելու հանգամանքի մասին, դա չի ազատում նրան պատժից:
«Բնականաբար, ոչինչ այս պահին պարզ չէ: Բայց եթե խոսվում է Պերմյակովի` սատանայական խմբավորման անդամ լինելու հանգամանքի մասին, դա չի ազատելու նրան պատժից, բայց մինչ այդ պետք է հասկանանք, թե ինչ է տեղի ունեցել: Ես չգիտեմ, թե ինչ պատիժ պետք է սահմանել այդ մարդու նկատմամբ, եթե կարելի է նրան մարդ անվանել: Իսկ գյումրեցին ակնկալում է միայն դեպքի պարզաբանումը: Չգիտեմ ինչու, բայց «ինչուներն» ավելի շատ են հիմա»,-փաստում է բանասեր Հասմիկ Խաչատրյանը:
Ըստ պատմաբան Արտակ Հովհաննիսյանի` դեպքից մեկ տարի անց «ինչուներն» այնքան շատ են ու գնալով ավելի են շատանում, որ բացառել որևէ բան, այդ թվում նաև սադրանք երկու երկրների՝ Հայաստանի և ՌԴ հարաբերությունների վատացման նպատակով՝ չի բացառվում:
«Անկեղծ ասած` մեկ տարվա ընթացքում ոչինչ պարզ չէ ինձ համար: Նույնիսկ նախաքննության ու դատավարության ընթացքում առաջ եկած կարծիքների ու բացահայտումների կտրվածքով ամեն ինչ մնում է բարդ, խրթին ու անհասկանալի: Գլխավոր հարցը՝ ինչու՞ այդ ընտանիքը։ Բոլոր վարկածներն ի վերջո բախվում են այդ ժայռին: Չեմ հավատում, որ այս հանցագործությունը կբացահայտվի, համենայն դեպս՝ ոչ հիմա, նույնիսկ երբեմն մտածում ենք` արդյո՞ք կատարողն այն մարդն է, ում դատում են, կամ արդյո՞ք նա եղել է մենակ, կամ արդյո՞ք սա մեծ մասշտաբի պլանավորված ծրագիր չէ: Երկու երկրների միջև հարաբերությունների վատացման նպատակով իրականցված սադրանքը ևս լուրջ վարկած է հատկապես ժամանակակից աշխարհում, երբ դա շատ օրինաչափ է դարձել: Կոնկրետ մեկ տարի անց ինձ ոչ մի բան պարզ չէ»,- նշեց պատմաբանը՝ ավելացնելով, որ դատավարության ներկա ընթացքը ևս շատերին հույս չի ներշնչում:
Ավելացնենք, որ ի հիշատակ հունվարի 12-ին սպանված Ավետիսյանների ընտանիքի` հունվարի 12-ին երեկոյան Գյումրու «Սբ. Աստվածածին» եկեղեցում կկատարվի հոգեհանգստի կարգ ու մոմավառություն, իսկ մինչ այդ հարազատները, մարզային ու քաղաքային իշխանությունների ներկայացուցիչները կայցելեն Ավետիսյանների շիրիմներին:
