ԵՐԵՎԱՆ, 11 հունվարի — Sputnik. Ռուս ուղղափառ եկեղեցու դիրքորոշումը Հայոց ցեղասպանության վերաբերյալ անփոփոխ է մնում, ասվում է Մոսկվայի և Համայն Ռուսաստանի Կիրիլ Պատրիարքի մամուլի քարտուղար Ալեքսանդր Վոլկովի մեկնաբանության մեջ, որը տեղադրված է Մայր Աթոռ Սուրբ Էջմիածնի տեղեկատվական համակարգի Facebook-ի էջում։
Հայր Ալեքսանդրը հայկական ԶԼՄ-ների համար մեկնաբանել է «Ռոսիա» հեռուստաալիքին տված Մոսկվայի և Համայն Ռուսաստանի Կիրիլ Պատրիարքի հարցազրույցը։
«Մենք միշտ բացահայտ պաշտպանել ենք ու շարունակելու ենք պաշտպանել այդ դիրքորոշումը միջազգային, միջքրիստոնեական ու միջկրոնական հարթակներում», — ասվում է հաղորդագրության մեջ։
Սիրիայում ու Իրաքում քրիստոնյաների աննախադեպ դրության հետ կապված` վերջին օրերին Պատրիարքը հարցազրույցի ժամանակ օրինակ է բերել Օսմանյան կայսրության պատմությունը, որտեղ նման ժամանակաշրջաններ են եղել, երբ մտցված կարգուկանոնն ապահովել է կայուն ու համեմատաբար անվտանգ կյանք կրոնական փոքրամասնությունների համար։
«Նման կարգի բացակայությունը միշտ, ինչպես 100 տարի առաջ Օսմանյան կայսրությունում, այնպես էլ ժամանակակից Իրաքում, Սիրիայում, Լիբիայում, հանգեցնում է իրադարձությունների ողբերգական զարգացման։ Հենց այդ պատճառով էլ ժամանակակից իրադարձությունները մենք անվանում ենք ցեղասպանություն։ Մեր եկեղեցու դիրքորոշումը Հայոց ցեղասպանության վերաբերյալ բազմիցս պարզ հնչեցվել ու արտահայտվել է մի շարք պաշտոնական հայտարարություններում ու Պատրիարքի ուղերձներում», — ասվում է հաղորդագրության մեջ։
Մեր դիրքորոշման վառ ապացույցն է ամենաբարձր մակարդակով Ռուս ուղղափառ եկեղեցու մասնակցությունը Հայ առաքելական եկեղեցու կարևորագույն իրադարձություններին. Պատրիարքի մասնակցությունը Մոսկվայի հայկական տաճարի օծման արարողությանը, Ռուսական եկեղեցու պատվիրակության այցը Երևան` Հայոց ցեղասպանության 100-րդ տարելիցի միջոցառումներին մասնակցելու համար, ասել է Հայր Ալեքսանդրը։
