Գոհար Սարգսյան, Sputnik
Չնայած Հայաստանի գլխավոր ինֆեկցիոնիստ Արա Ասոյանը նշում է, որ հանրապետությունում սուր շնչառական հիվանդությունների համաճարակ է ու հիվանդների 80 տոկոսը` H1N1-ով վարակված, սակայն առողջապահության նախարարությունում պնդում են` համաճարակ չկա, խուճապի մատնվել պետք չէ:
Այս պահին բժիշկները պայքարում են «խոզի գրիպով» հիվանդ ծննդկանի կյանքի համար: Նրա փոքրիկը ողջ է:
«Հիմա ստացիոնար բուժում է ստանում 101 հղի, իսկ թույլ կամ միջին ծանրության թոքաբորբ ունի 37-ը: Հղիները խոցելի խմբում են, դրա համար էլ նրանց խորհուրդ ենք տալիս պատվաստվել»,-ասում է ԱՆ փոխնախարար Վահան Պողոսյանը:
Իսկ հիգիենիկ և հակահամաճարակային տեսչության պետ Արտավազդ Վանյանն ասում է, որ «խոզի գրիպից» շատ վախենալ պետք չէ: Պարզապես անհրաժեշտ է ժամանակին դիմել բժշկի օգնությանը: Հիվանդությունը աչքաթող անելու և ինքնաբուժմամբ զբաղվելու հետևանքով առաջանում են բարդություններ, որոնք կարող են հասցնել մահվան ելքի: 2015 թվականի վերջին մահացել է 3 մարդ, վերջին օրերին` ևս 3-ը, բոլորն էլ` «խոզի գրիպի» բարդության հետևանքով:
«Պարտադիր չէ, որ խոզի գրիպն ընթանա լուրջ բարդություններով: Եղել են հիվանդներ, որոնք անգամ ջերմություն չեն ունեցել»,-ասում է Արտավազդ Վանյանը:
Իսկ ընդհանրապես H1N1-ն ունի բնորոշ ախտանշաններ` բարձր ջերմություն, հազ, մկանային թուլություն, ստամոքսի խանգարում և փսխում, ինչպես նաև հոդացավ ու գլխացավ: Ախտանշաններն առաջանում են վիրուսակիր մարդու հետ շփումից 3-5 օրվա ընթացքում: Ռիսկի խմբում են հղիները, նորածիններն ու մինչև 4 տարեկան երեխաները, տարեցները, բուժաշխատողներն ու քրոնիկ հիվանդություններ ունեցողները: Նրանց բոլորին խորհուրդ է տրվում պատվաստվել:
«Գրիպը խնդրահարույց է ամբողջ աշխարհում: Եվրոպական տարածաշրջանում 56 տոկոս շրջանառվում է H1N1-ը, 25 տոկոս` B տեսակի գրիպը, 10-11 տոկոս` սեզոնային գրիպն ու չտիպավորված գրիպները»,-ասում է ԱՆ փոխնախարար Վահան Պողոսյանը:
Պարզագույն թվացող, բայց խիստ անհրաժեշտ մի քանի խորհուրդ Sputnik Արմենիայի կողմից:
Նախընտրելի է, որ գրիպով հիվանդ մարդը խուսափի ընտանիքի անդամների հետ ուղղակի շփումից, իսկ այլընտրանքի բացակայության դեպքում դիմակ կրի: Դիմակը հանելիս այն պետք է ներս ծալել ու նոր նետել: Ի դեպ, դիմակի կրումը պարունակում է նաև հոգեբանական կողմ. տեսնելով դիմակով մարդու` շրջապատի մարդիկ առավել զգույշ են լինում:
Պետք է օգտագործել թղթե անձեռոցիկներ ու մեկ անգամ օգտագործումից հետո դեն նետել, դա օգնում է խուսափել կրկնակի վարակվելուց:
Տան սենյակներն օդափոխելը ևս կարևոր պայման է:
Հիվանդը պետք է պահպանի հազալու և փռշտալու տարրական հիգիենան:
Տեղեկացնենք նաև, որ հանրապետությունում շրջանառվող գրիպի հարուցիչների դեմ լիարժեք պայքարելու համար Երևանի և մարզային բժշկական հաստատություններն ապահովված են անհրաժեշտ դեղերով և բժշկական պարագաներով:
Մեր տեղեկություններով` ուշադրության կենտրոնում է նաև զինծառայողների առողջական վիճակը: Առողջապահության նախարարի հանձնարարությամբ շարունակվում է գործակցությունը ՀՀ ԶՈՒ ռազմաբժշկական ծառայության և հանրապետական զինկոմիսարիատի հետ` տարբեր վարակիչ հիվանդություններով կամ ջերմող զինակոչիկների մուտքը զորամաս կանխելու նպատակով:
