ԵՐԵՎԱՆ, 11 հունվարի — Sputnik, Անի Լիպարիտյան. Թեև Հայաստանի ճանապարհային ոստիկանության աշխատակիցները որոշել են աչք փակել Նոր տարվա օրերին առատ ձյան պատճառով կատարված մի շարք խախտումների վրա, այնուամենայնիվ վարորդների մեծ մասը խուսափել է արձակուրդներին մեքենա վարել։
Նման հետաքրքիր միտում է նկատել Sputnik Արմենիա պորտալի թղթակիցը` զրուցելով վարորդների հետ։ Ճանապարհներն անանցանելի էին ձյան պատճառով, այդ պատճառով շատերը զգուշանում էին ղեկին նստել։
«Ես ընդհանրապես մեքենա չեմ վարել Ամանորի տոներին։ Շատերը նույնիսկ սովորական օրերին են ահավոր վարում, իսկ այդ օրերին իրավիճակն էլ ավելի է վատանում», — նշեց Մարիամը։
Ինչպես պարզվեց, միայն կանայք չէ, որ խուսափում էին այդ օրերին մեքենա վարել։ Նույնիսկ տղամարդիկ, ովքեր սովորաբար ավելի շատ են սիրում իրենց տրանսպորտային միջոցները, քան կանայք, հրաժարվեցին այդ օրերին մեքենա վարել։
Ինչ տոն առանց խմիչքի
Իսկ այսօրվանից ուժի մեջ են մտել ճանապարհային երթևեկությանը վերաբերող օրենքի փոփոխությունները, այսպես կոչված` տուգանքների «համաներումը»։
Արդարադատության նախարար Արփինե Հովհաննիսյանը, ներկայացնելով օրենսդրության կարևոր կետերը, նշեց, որ խոսքը խաչմերուկներում կատարված խախտումների մասին է` հետիոտնային անցումների հետ հատման հատվածում։ Այդ խախտումները ՃՏՊ-ի պատճառ չեն ու մարդու կյանքի համար վտանգ չեն ներկայացնում։
«Այսօրվանից ուժի մեջ է մտնում «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին» ՀՀ օրենքը և օրենքին կից ներկայացված օրենքների փաթեթը- գրել է Հովհաննիսյանը Facebook սոցցանցի իր էջում։
Նախարարը պարզաբանել է որոշ օրենքներ։ Մասնավորապես, նոր իրավակարգավորումը հնարավորություն է ստեղծում ամենաշատը տարածված մի շարք իրավախախտումների համար կիրառել ոչ թե տուգանք այլ՝ նախազգուշացում:
Այսուհետ՝ տրանսպորտային միջոցների վարորդների կողմից կանգառի և (կամ) կայանման կանոնների խախտում չի համարվում, երբ կանգառը կատարվել է միայն ուղևորների նստելու կամ իջնելու նպատակով և այն չի գերազանցել մեկ րոպե ժամանակահատվածը
Առանց վարորդական վկայականի կամ այլ փաստաթղթերի տրանսպորտային միջոցը վարելու դեպքում, ինչպես նաև մգացված ապակիներով երթևեկելու համար սահմանվել է խրախուսական նորմ, որով անձը վարչական պատասխանատվության չի ենթարկվում, իսկ վարչական տույժ նշանակված լինելու դեպքում անձն ազատվում է այն կատարելու պարտականությունից, եթե իրավախախտումը հայտնաբերելու պահից 24 ժամվա ընթացքում լիազորված մարմնին (պաշտոնատար անձին) է ներկայացնում վարորդական վկայականը կամ այլ փաստաթուղթ կամ տեղում կամ 24 ժամվա ընթացքում վերացնում է խախտման հատկանիշները:
Սակայն միշտ չէ, որ գործում է «փափուկ ուժը»։ Մասնավորապես, խստացվել են ոչ սթափ վիճակում տրանսպորտային միջոցը վարելու համար նախատեսված տուգանքները:
