ԵՐԵՎԱՆ, 11 հունվարի- Sputnik. Լուրերն այն մասին, որ սնանկ ճանաչված ազգային փոխադրող «Արմավիա» ընկերության նախկին սեփականատեր Միխայիլ Բաղդասարովին առաջարկվել է վրացական Georgian Airways ընկերության փոխտնօրենի պաշտոնը, չհաստատվեցին։
ԶԼՄ-ները հղում են անում Newmag ամսագրին Բաղդասարովի տված հարցազրույցին, որտեղ նա իբրև թե ասել է. «Ամեն ինչ նոր էջից եմ սկսել։ Վրացական Georgian Airlines-ը փոխտնօրենի պաշտոն է առաջարկել»։
«Դա ոչ ճիշտ տեղեկատվություն է, նման բան չկա։ Դա հորինված է»,- Sputnik Արմենիայի հետ զրույցում ասաց Georgian Airways-ի տնօրենի պաշտոնակատար Ռոբերտ Հովհաննիսյանը։
Sputnik Արմենիայի խմբագրությանը չհաջողվեց կապվել Միխայիլ Բաղդասարովի հետ։ Մեր աղբյուրների համաձայն` նա Հայաստանից դուրս է գտնվում։
1993 թվականին հիմնադրվել է Airzena ավիաընկերությունը, որը 2004 թվականին անվանափոխվել է ու դարձել Georgian Airways։
2011 թվականին տեղեկատվություն հայտնվեց, որ «Արմավիա» ավիաընկերությունը ծրագրում է գնել Georgian Airways-ը, սակայն ամեն ինչ մնաց մտադրությունների մակարդակում։ 2013 թվականին «Արմավիան» սնանկացավ, և հայկական երկնքում դեռևա ազգային փոխադրող չկա։
