ԵՐԵՎԱՆ, 11 հունվարի-Sputnik. Սեզոնային գրիպն ունի մեկ օրինաչափություն. այն ժամանակ առ ժամանակ բռնկվում է: 2016 թվականին Հայաստանը սուր վարակիչ հիվանդությունների համաճարակի շեմին է: Առողջապահության նախարարությունը կոչ է անում գրիպի դեմ պատվաստվել: Հորդորը հատկապես ուղղված է ռիսկային խմբերին, այսինքն`հղիներին, բուժաշխատողներին, մանկատներում ու ծերերի խնամքի կենտրոններում բնակվողներին, ինչպես նաև քրոնիկ հիվանդություններ ունեցողներին:
«Հղիները չեն ցանկանում պատվաստվել, քանի որ մտավախություն ունեն, որ պատվաստանյութը կարող է ազդել պտղի վրա: Նման բան չկա, գրիպի դեմ պատվաստանյութն ամբողջությամբ անվնաս է: Բնակչության շրջանում տարածված է, որ պատվաստում ենք ու արհեստականորեն հիվանդանում: Դա անտեղյակության արդյունք է»,-ասում է Գայանե Սահակյանը:
Նրա խոսքով` սեզոնային գրիպի պատվաստանյութն ամբողջ աշխարհում ապացուցել է արդյունավետությունը: Պատահական չէ, որ պատվաստված մեր բուժաշխատողների շրջանում գրիպով հիվանդ չկա:
«Շատ եմ կարևորում, որ մեր քաղաքացիները դադարել են զբաղվել ինքնաբուժմամբ և գրիպի նախանշանների դեպքում անմիջապես դիմում են բժշկի»,- ասում է Իմունիզացիայի ծրագրի ղեկավարը:
Նա պատմեց նաև H1N1-ի կամ բոլորին հայտնի «խոզի գրիպի» նախապատմությունը. գրիպի Ա տեսակին պատկանող այս հիվանդությունն առաջին անգամ նկատվել է խոզերի մոտ ու դրանից էլ առաջացել է անվանումը:
Գայանե Սահակյանն ասում է, որ այն նույնքան բարդություններ կարող է առաջացնել, որքան գրիպի ցանկացած ենթատեսակը:
Թեմայի վերաբերյալ այլ մանրամասների կարող եք տեղեկանալ ժամը 18:00-ին Sputnik ռադիոկայանով հեռարձակվող «Կաղապարից դուրս» հաղորդաշարի շրջանակում:
