ԵՐԵՎԱՆ, 11 հունվարի- Sputnik, Անի Լիպարիտյան. Երաժշտի երկրպագուները սգում են, չեն հավատում սիրելի երգչի մահվանը և Ֆեյսբուքում տարբեր գրառումներ են անում Բոուիի վերջին գրառման տակ։
«Դևիդ Բոուին խաղաղ վախճանվել է իր ընտանիքի շրջապատում 1,5 տարի քաղցկեղի դեմ համառ պայքարից հետո»,- գրված է Բոուիի էջում։
Բառացիորեն մի քանի օր առաջ թողարկվել է երաժշտի նոր տեսահոլովակը` «Լազար» (Lazarus) երգի հիման վրա։ Հոլովակում Բոուին պառկած է հիվանդասենյակում։
«Լազար» երգում այսպիսի տողեր կան.
«Ես ապրում էի որպես արքա
Միայն այդպես և ոչ մի այլ կերպ,
Գիտես` ես ազատ կլինեմ
Ինչպես այն կապույտ թռչունը…»
«Խնդրում եմ, ասեք, որ սուտ է, որ խաբկանք է։ Բոուին նախկինում էլ է կեղծ տեղեկատվության զոհ դարձել»,- գրել է սոցցանցի օգտատերերից մեկը` Լուիս ԴեԿառլոն։
«Դևիդ Բոուի, Դուք յուրահատուկ եք… Տարօրինակ, փայլուն, պոետ, վոկալիստ, արտիստ։ Դուք ոճի արքա եք, հազարավոր գույների մայրամուտ։ Շնորհակալ եմ այն երաժշտության համար, որը բազմաթիվ անգամ փրկել է ինձ»,- գրում է Էլեն Մաքինը։
Դերասան և ռեժիսոր Բեն Ֆիլիպսը գրել է. «Հանգչիր խաղաղությամբ։ Ես մեծացել եմ` լսելով Ձեր երգերը հորս ավտոմեքենայում։ Ցավակցում եմ ընտանիքին»։
Այս պահին ճակատագրական է հնչում Բոուիի արտահայտությունը. «Ես դեռ չգիտեմ, թե ինչով եմ զբաղվելու հաջորդ տարի։ Բայց ինչ էլ լինի, ձանձրալի չի լինելու»։
System Of a Down ռոք խմբի մենակատար Սերժ Թանկյանը Instagram-ի իր էջում տեղադրել է իր, Դևիդ Բոուիի և Դարոն Մալաքյանի համատեղ լուսանկարը և գրել.
«Շատ տխրեցի, երբ կարդացի ամենահիանալի արտիստներից մեկի, ինչպես նաև ամենահամեստ և սիրալիր մարդկանցից մեկի մահվան լուրը։ Հանգչիր խաղաղությամբ, Դևիդ Բոուի»։
Դևիդ Բոուիի իսկական անունը Դևիդ Ռոբերտ Ջոնս է։
Երգչի երաժշտական կարիերան սկսվել է 1960-ական թթ.-ին, նա լայն ճանաչում է ստացել 1972թ.-ին, երբ նրա ստեղծագործություններից մեկը հայտնվել է բրիտանական հիթ-շքերթի վերին հորիզոնականներում։ NME ամսագիրը 2000թ.-ին Բոուիին ճանաչել է հարյուրամյակի ամենաազդեցիկ երաժիշտը։ Նա ընդգրկվել է նաև «Հարյուր մեծագույն բրիտանացիների» ցուցակում և ստացել ասպետի տիտղոս, սակայն հրաժարվել է դրանից։
Երաժշտի ալբոմներն ընդգրկվել են «Բոլոր ժամանակների 500 մեծագույն ալբոմների» ցուցակի մեջ։
