ԵՐԵՎԱՆ, 11 հունվարի- Sputnik. Հայաստանի Էրեբունի ավիացիոն ռազմակայանը 2016թ.-ի երկրորդ կեսին կհամալրվի բազմաթիրախային ճակատային ՄԻԳ 29 կործանիչների նոր խմբաքանակով: Քաղաքագետ Ստեփան Գրիգորյանը Sputnik Արմենիա ռադիոկայանի եթերում խոսում է այն մասին, թե Ռուսաստանն ինչ նպատակով է իր ռազմական ներկայությունն ուժեղացնում Հայաստանում:
«Պատճառները շատ են: Դրանցից մեկը վերջին 5-7 տարիների ընթացքում Ռուսաստանի վարած արտաքին քաղաքականությունն է: Ռուսաստանը ցանկանում է ուժեղացնել իր ներկայությունը նախկին ԽՍՀՄ տարածքում: Նա բացահայտորեն ասում է, որ իր ազդեցության գոտին նախկին ԽՍՀՄ տարածքն է։ Այդ քաղաքականության համաձայն, նա սկսել է ուժեղացնել Հայաստանում իր ռազմակայանը: Ռազմակայանի զինվորական կազմը վերջին տարիների ընթացքում բավական մեծացել է, ռազմական տեխնիկան նույնպես ավելացել է: Երկրորդ գործոնը կապված է ռուս-թուրքական հարաբերությունների վատացման հետ: Դա խթան է հանդիսացել, որ Ռուսաստանն ավելի ուժեղացնի իր բազան»,- նշեց քաղաքագետը:
Խոսելով այն մասին, թե այս իրավիճակում Հայաստանն ինչ օգուտ կարող է քաղել, քաղաքագետը նշեց. «Ես չեմ տեսնում ոչ մի շահ, ճիշտ հակառակը, եթե Ռուսաստանը ինչ-որ գործողություն ծավալի Թուրքիայի դեմ մեր տարածքով, դրանից կտուժի, առաջին հերթին, Հայաստանը, որը կարող է թիրախ դառնալ: Եթե Հայաստանը Ռուսաստանին բացահայտորեն աջակցի Սիրիայի գործողությունների հարցում, ապա ծայրահեղական խմբավորումները նույնպես կարող են բացասական տրամադրվել հայերի դեմ, Մերձավոր Արևելքում բնակվող հայերը կարող են դառնալ թիրախ: Անկեղծ ասած, դեռ չեմ տեսնում Հայաստանի շահը»:
Այս իրավիճակում Հայաստանը կարող է պայման դնել Ռուսաստանի առջև. եթե նա ուժեղացնում է իր ներկայությունը Հայաստանում, ապա իրավունք չունի առանց Հայաստանի համաձայնության գործողություն ծավալել։ Երկրորդ պայմանը, Ղարաբաղի անկախությունը ճանաչելն է: Եթե այս հարցում Ռուսաստանն աջակցում է Հայաստանին, ապա նա պետք է ինչ-որ օգուտ քաղի այդ իրավիճակում:
Այն հարցին, թե ինչով է պայմանավորված ռազմամթերքի ներկրումը, հատկապես ՀՕՊ համակարգերի ակտիվացումը և սպառազինությունները համալրումը, և կա՞ արդյոք պատերազմի հավանականություն, Գրիգորյանը պատասխանեց.
«Երբ Թուրքիան խոցեց ռուսական ռազմական ինքնաթիռը, պարզ դարձավ, որ տարածաշրջանում ամեն ինչ կարող է լինել: Դա անսպասելի քայլ էր: Այդ օրինակը ցույց տվեց, որ ամեն ինչ կարող է պատահել, և Ռուսաստանը պատրաստվում է պատասխանել Թուրքիային, եթե այդ երկրի ուղղաթիռները վաղը խախտեն Հայաստանի կամ ԱՊՀ երկրների օդային սահմանը»:
Ստեփան Գրիգորյանը նշեց, որ ռազմակայանի ուժեղացումը կապված է նաև Սիրիայի հետ: Ռուսաստանը Սիրիայում լայնածավալ գործողություններ է իրականացնում: Նա բավական ակտիվ ընդգրկվել է սիրիական հակամարտության մեջ: Պարզ է, որ առկա է զենք-զինամթերք ապահովելու, այդ տարածաշրջան նոր զինատեսակներ տեղափոխելու խնդիր, չի բացառվում, որ Ռուսաստանը մտածում է այս ռազմակայանը որպես տարանցիկ կետ օգտագործելու մասին:
«Քանի որ Հայաստանը մոտ է գտնվում այդ տարածաշրջանին և փայլուն հարաբերություններ ունի Իրանի հետ, կարելի է այդ զինատեսակները Հայաստանից Իրանի տարածքով տեղափոխել Սիրիա: Ռուսաստանն այսօր բավական բարդ ճանապարհով է զինամթերքը հասցնում Սիրիա: Մի բան է մի քանի ծովերով զինամթերքը տեղափոխելը, մեկ այլ բան՝ Հայաստանից Իրանի տարածքով Սիրիա հասցնելը: Առավել ևս, որ Ռուսաստանը երկու երկրների հետ էլ լավ հարաբերություններ ունի»,- ասում է Ստեփանյանը:
