Ինչպես ազատվել հետտոնական դեպրեսիայից

Լաուրա Սարգսյան, Sputnik.

Հայաստանի բնակչության համար տոնական օրերը սովորաբար մեկնարկում են դեկտեմբերի 31-ին և ավարտվում հունվարի 8-ին: Սա այն ժամանակն է, երբ յուրաքանչյուրը մոռացության է մատնում առօրյա հոգսերն ու սպասում Ամանորի ու Սուրբ ծննդյան հրաշքին: Իրարանցում, ցիտրուսային մրգեր, տոնածառ, հանդիպումներ բարեկամների ու ընկերների հետ: Ամեն տարի Նոր տարին մենք նշում են նոր սպասումներով, սակայն, ինչպես միշտ, բախվում ենք իրականությանը:

Սովորաբար այս ընթացքում ուսանողները պատրաստվում են քննական շրջանին, իսկ տնային տնտեսուհիներն իրենց օրն անցկացնում են գազօջախի մոտ. պետք է սեղան գցել, լվանալ անթիվ-անհամար ափսեները։

Ոմանք վերջին կոպեկներն են հաշվում, որ սեղանի ճոխությամբ չզիջեն մյուսներին։ Պատրաստ են նույնիսկ մեկ կամ նույնիսկ մի քանի ամիս առանց գումարի մնալ և տոկոսները «փակել», միայն թե ամեն ինչ տեղը տեղին լինի: Ի՞նչ է ստացվում` մի շարք խնդիրներ ու հոգնածություն «շալակած», ջղագրգիռ հատում են հին տարվա շեմն ու դիմավորում Նոր տարին: Հատկապես սթրեսային է տոներին հաջորդող առաջին աշխատանքային օրը:

Հոգեբան Աննա Բադալյանը Sputnik Արմենիա պորտալի թղթակցին պատմել է, թե ինչ է պետք անել, որպեսզի առաջին աշխատանքային օրն ուրախ անցնի, ծանր ու նյարդայնացնող չթվա:

Տոնական օրերը պետք է ոչ թե աննպատակ անցկացնել, այլ` խանդավառությամբ: Շատ կարևոր է գիտակցել, որ մարդուն որոշակի ժամանակ է պետք հանգիստ ռիթմից սովորական աշխատանքային գրաֆիկի անցնելու, հոգեբանական ու ֆիզիկական ադապտացման համար:

Հոգեբանը հեշտ լուծում է առաջարկում առաջին հայացքից բարդ թվացող այս խնդրի համար:

Առավոտ կանուխ պետք է անուշաբույր թեյ կամ բուրավետ սուրճ խմել, ինչը կօգնի արագ ուշքի գալ, իսկ հայելու մեջ անդրադարձող ժպիտը դրական նոտաներ կհաղորդի:

«Այս տարի կառավարությունը աշխատանքի դուրս գալու վերաբերյալ ճիշտ որոշում է կայացրել, հենց ուրբաթ, ոչ թե երկուշաբթի, ինչպես նախկինում էին անում։ Աշխատանքային մթնոլորտը բոլորին, այսպես ասած, ուշքի կբերի, իսկ ավանդական հանգստյան օրերը կօգնեն պատրաստվել հաջորդ աշխատանքային շաբաթվան», — ասում է հոգեբանը:

Բադալյանի խոսքով` այս առումով մեծ նշանակություն ունի նաև սիրելի աշխատանքի գործոնը, առողջ մթնոլորտը կոլեկտիվում ու աշխատավայրում գնահատված լինելու զգացողությունը: