ԵՐԵՎԱՆ, 8 հունվարի — Sputnik, Դավիթ Գալստյան. Ձմեռային զորակոչի առաջին օրն է, զինկոմիսարիատում աշխատանքային իրարանցում է, զորակոչիկներն այսուայն կողմ են գնում, դրսում նրանց են սպասում հարազատներն ու բարեկամները:
Զորակոչիկները հերթով մոտենում են արկղին ու անթաքույց հույսով դուրս քաշում թերթիկը, որի վրա գրված է զորամասի համարը: Ոմանց աչքերում ուրախություն է երևում, ոմանք խոժոռում են դեմքը, մյուներն էլ շփոթված հեռանում են արկղի մոտից:
Նրանց դիմաց նստած ծնողներն ավելի մեծ լարվածությամբ են սպասում բաղձալի թվերին: Դահլիճում լռություն է, ժամանակ առ ժամանակ հնչում է հերթական զորամասի անվանումը:
Միջանցքում շուրջ տասը մարդ է կանգնած: Սպան խիստ ձայնով հրամաններ է տալիս, թե ինչ կարելի է անել, իսկ ինչ չի կարելի:
Դրսում հատուկ մեքենա է կանգնած, որտեղ ծառայության վայրը որոշելուց հետո զորակոչիկները ֆլյուրոգրաֆիա են անցնելու: Զորակոչիկների հերթական խումբը` մինչև գոտկատեղը մերկ կանգնած, սպասում է ստուգման: Կատակում են, միմյանց հույս տալիս, ծանոթներ ու ընկերներ փնտրում:
«Մեջքս պոկվում է, էլ չեմ դիմանում…», — ինչ-որ մեկին ասում է ամբողջ օրն աշխատած բժիշկը:
Եվս մի քանի հոգի դահլիճ են մտնում, որտեղ մեկ ուրիշ հանձնաժողով է նստած: Այնտեղ զորակոչիկները տարբեր հարցերի են պատասխանում` որտե՞ղ են սովորում, առողջական խնդիրներ ունեն, թե՞ ոչ, կարո՞ղ են ծառայել…
Հիմնականում պատասխանը հազիվ է լսվում՝ համալսարանում…, դպրոցում…, ամեն ինչ նորմալ է…, տեսողության խնդիր ունեմ…, պատրաստ եմ…»: Պատին փակցրած է զինծառայողների երդման տեքստը:
«Տրամադրությունս նորմալ է, պատրաստ եմ ծառայելու: Ավագ եղբայրս արդեն ծառայել է, եկել եմ սեփական ցանկությամբ», — ասում է Բջնի գյուղի բնակիչ Դանիելը:
Մանուկը Կոտայքի մարզի Ֆոնտան գյուղից է: Նա շատ ավելի ուրախ տեսք ու բարձր տրամադրություն ունի:
«Ես քոլեջում էի սովորում, ավտոմեխանիկայի ֆակուլտետում, հետո` ԴՈՍԱԱՖ-ում, վարորդ եմ աշխատելու բանակում», — ասում է Մանուկը:
Կողքին Հարությունն է կանգնած, նա էլ խոհարարի մասնագիտություն ունի: Գրիգորն էլ շինարարականում է սովորել…
Զորակոչիկների բարեկամները փորձում են ամեն կերպ մտնել զինկոմիսարիատ: Զանգում են ծանոթներին, ընկերներին ու բոլորովին անծանոթ մարդկանց, վերջին վհատ փորձերն անում, որպեսզի ինչ-որ կերպ ազդեն որդու ճակատագրի վրա:
Դարպասներից այն կողմ մեզ է մոտենում մի երիտասարդ, խնդրում, որ պարզենք, թե որ զորամասն է «բաժին ընկել» իր եղբորը, հետո փորձում է ինքնուրույն ներս սողոսկել, հասկանալ ում կարելի է մոտենալ, ումից որևէ բան ճշտել:
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/14/1591477_0:31:1600:1036_600x0_80_0_0_07a5e2def42fb317c16ba22fe5185cbc.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/16/1591604_0:62:1601:1068_600x0_80_0_0_65456c4a1d74d3968b3c9bbe76bdc990.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/16/1591682_0:98:1601:1103_600x0_80_0_0_ac680a59f03fbfb8a90942ec044d7e91.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/17/1591764_0:168:1600:1173_600x0_80_0_0_ffe158bb5c24ed5a43d963759c0eb562.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/19/1591998_0:142:1601:1147_600x0_80_0_0_e3f572407a04e900f65a8ace6ce62946.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/20/1592074_0:0:1600:1006_600x0_80_0_0_a3757508e75f8451a91dac62621e3ee6.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/21/1592150_0:52:1600:1056_600x0_80_0_0_1c151dbb057ba84fbdf33efb65b19cbb.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/22/1592229_0:1:1601:1068_600x0_80_0_0_c9586bdf0b319a27d3dce2e5d34e468b.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/24/1592450_0:30:1600:1036_600x0_80_0_0_cad2eb04f33b74f3e1c08f5cc3cec3fd.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/25/1592577_0:85:1600:1090_600x0_80_0_0_357b62cfcda21fc141e7469354ff0801.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/26/1592655_0:56:1600:1062_600x0_80_0_0_66c2f6ec8da8e3aef39e3774c9117563.jpg)
![Ձմեռային զորակոչ Ձմեռային զորակոչ - Sputnik Արմենիա](https://cdn.am.sputniknews.ru/img/159/27/1592731_0:0:1600:1006_600x0_80_0_0_ddabf9cbb0fbe5133626653376227e01.jpg)
Ծնողներն արդեն իմացել են, թե իրենց որդիները որ զորամասում են ծառայություն անցնելու և հերթով դուրս են գալիս զինկոմիսարիատից:
Ոմանք գոհ են, ոմանք բարեկամներին են զանգահարում, կանանց մեծ մասը լաց է լինում, իսկ ամուսինները հիմնականում կիսաձայն ու մեղմ հանգստացնում են նրանց:
Երևանցի մի ընտանիք առաջնեկին է ճանապարհում բանակ, երկրորդն էլ մեկ տարի հետո կգնա ծառայելու: Ասում են՝ որդին Տավուշի մարզում է ծառայելու, կուզեին՝ ավելի մոտ լիներ։
… Դատարկ ավտոբուսները մոտենում են, ամբողջ ուշադրությունը սևեռվում է մեքենաների ուղղությամբ: Դրանցից մեկով նրանց որդին է բանակ գնալու…
Ալավերդցի ամուսինները փոքր-ինչ հեռու են կանգնել: Սուրճ են ըմպում, զրուցում են, սպասում Ալավերդու զինկոմիսարիտաից Երևան եկող որդուն:
«Հիմա նրանք ճանապարհին են, դուրս են եկել, սակայն ճանապարհները վատն են, դեռ տեղ չեն հասել: Շուտով կհասնեն», — ասում է ընտանիքի հայրը` Վասիլն ու հեռանում հեռախոսով խոսելու: Նրա կինը` Ռաիսան, ասում է, որ հոգեպես պատրաստ են որդու` բանակ գնալուն, իսկ զինակոչիկ Ռուբենն ասում է, որ լավ տրամադրություն ունի:
Այդ պահին մեզ է մոտենում Մարզպետ անունով երիտասարդը, ռուսերեն հարցնում, թե որտեղից ենք մենք: Նա ծառայել է մեկուկես տարի, հետո նրան տուն են ուղարկել:
«Ես Ռուսաստանից եմ: Տարբեր տեղեր եմ ծառայել, հետո ոտքս ցրտահարվել է, և ինձ տուն են ուղարկել: Հաշմանդամություն ունեմ, թոշակ եմ ստանում: Իսկ այստեղ եմ եկել եղբորս ու նրա ընկերոջը ճանապարհելու համար», — ասում է Մարզպետը:
Հավաքակայանի մոտ տաք թեյ ու քաղցրավենիք է վաճառում Կարինե տատիկը: Նա այստեղ է լինում ամեն տարի, այս ընթացում հասցրել է զորամասերի անվանումների շնորհիվ անգիր անել Հայաստանի քարտեզը: