ԵՐԵՎԱՆ, 8 հունվարի — Sputnik, Արմենուհի Մխոյան. Շիրակի մարզի Բանդիվան գյուղում բնակվող Մանուկյանների ընտանիքում զավակներից մեկի բանակի քեֆն ու մյուսի` բանակից վերադառնալու համար մատուցված մատաղի արարողությունը վերածվեց թունավորման «արարողության»:
Նույնիսկ չէին հասցրել հունվարի 9-ին մատուցվող մատաղը եփել, երբ անզգուշության կամ ջրատաքացուցիչից օգտվելու կանոնները խախտելու հետևանքով ժամը 14:00-ի սահմաններում հյուրասենյակում հավաքվածների ինքնազգացողությունը սկսեց վատանալ: Մանուկյանների բարեկամը` Ցողիկ Զադոյանը պատմում է, որ չէին հասցրել նույնիսկ մատաղը եփել, երբ երեխաներից մեկը սկսեց բողոքել, որ վատ է զգում իրեն: Ավելի ուշ սկսեցին բողոքել նաև մյուսները: Արդեն ժամը 14:30-ին «Գյումրի բժշկական կենտրոնն» ընդունեց շմոլ գազից թունավորված քաղաքացիներին, որոնց մոտ էկզոգեն թունավորում ախտորոշվեց: Քաղաքացիներին ցուցաբերվեց համապատասխան բուժօգնություն:
«Տուժածների առողջական վիճակն այս պահին համարվում է կայուն: Թունավորումը կարելի է գնահատել թեթև աստիճանի: Բոլորը ներկա պահին ստանում են ամբուլատոր բուժում և տուն կվերադառնան այն ժամանակ, երբ նրանց վիճակը կլավանա։ Հոսպիտալացման կարիք չի զգացվում»,- վստահեցնում է բաժանմունքի վարիչ Արմեն Խաչատրյանը:
Շմոլ գազի թունավորման առաջին հետևանքները զգացած և Գյումրու «Ավստրիական մոր և մանկան հիվանդանոց» տեղափոխված 5 փոքրիկների վիճակը ևս բավարար է: Այս մասին հայտնեց հիվանդանոցի վերակենդանացման բաժանմունքի վարիչ Արշիկ Դարիբալթյանը: Հիվանդանոց տեղափոխված 5 երեխաների վիճակը հիվանդանոց ընդունվելու պահին եղել է բավարար, նկատվել է թուլություն, սրտխառնոց, գլխապտույտ, որովայնային ցավ: Այժմ երեխաները հիվանդանոցում են: Մի քանի ժամ պահելուց հետո, եթե նրանց վիճակը կայունանա, երեխաներին տուն կուղարկեն:
Եթե չհաշվենք այս դեպքը, մարզի փրկարարական վարչությունը 2016 թվականի առաջին օրերին արտասովոր դեպքեր չի գրանցել։ ՀՀ-ի ՏԿԱԻՆ-ի Շիրակի մարզային փրկարարական վարչության 911 ծառայությունը ստացել է 1184 հեռախոսազանգ, արձագանքել է 12-ի դեպքի` շմոլ գազի թունավորում, հրդեհ, ձնաբուք, ճՏՊ:
Նշենք, որ ձյան հետևանքով արգելափակումից հանվել է 31 ավտոմեքենա՝ 82 ուղևորով: Շիրակի մարզային փրկարարական վարչության պետի տեղակալ, փրկարար ծառայության փոխգնդապետ Կարեն Եղշատյանը հայտնեց, որ այս գործողությունները արագ և օպերատիվ իրականացվել է վարչության և մարզի ճանապարհների սպասարկումն իրականացնող ընկերությունների, ինչպես նաև համապատասխան ընկերությունների և մարզպետարանի հետ համակարգված աշխատանքի արդյունքում:
Ամեն ինչ նորմալ է, բայց կա նաև մի բայց՝ մարզի փրկարարական վարչությունն այս օրերին, բացի կարևոր ահազանգերից, ստացել է նաև տարաբնույթ «ուրախ» զանգեր՝ տոնածառը զարդարելու, տորթ ուտելու հրավերից մինչև տաքսու պատվերի և շուկա գնալու ու միրգ գնելու առաջարկներով:
Ինչպես տեղեկացնում է Կարեն Եղշատյանը, թեև զանգահարողների մեջ եղել են նաև մեծահասակներ, սակայն մեծ է երեխաների թիվը: Նման դեպքերում վարչության աշխատակիցները պարզապես զգուշացնում են, որ 911 ծառայության բոլոր զանգերը ձայնագրվում են, իսկ նմանօրինակ զանգերը խաթարում են անչափ կարևոր ծառայության աշխատանքը:
