Գոհար Սարգսյան, Sputnik
Զանգը զանգի հետևից: ՏԿԱԻՆ-ի ճգնաժամային կառավարման կենտրոնում հեռախոսները չեն հանգստանում: Դրանց մեջ լինում են ինչպես արտակարգ պատահարների, այնպես էլ զվարճալի զանգեր: Ծիծաղաշարժ զանգերը ստանալուն պես նախարարության աշխատակիցները դրանք հավաքում են ու պահում` մի օր իրար վերապատմելու և ժպտալու ակնկալիքով: Sputnik Արմենիային դրանցից մի քանիսը ներկայացրել է ՏԿԱԻՆ–ի ճգնաժամային կառավարման կենտրոնի պետ Հովհաննես Խանգելդյանը:
Ամանորի նախօրեին «911» ծառայությանն ահազանգ է ստացվել, որ ավտոմեքենա է այրվում.
— Հարգելի քաղաքացի, խնդրում եմ հասցեն ասեք:
— Լավ-լավ, մի վայրկյան, հիմա կզանգեմ, ինձ երկրորդ գծով զանգահարում են:
Հայ փրկարարներին հանձնարարված է օգնության ձեռք մեկնել ցանկացած քաղաքացու, ով դժվար իրավիճակում է գտնվում և օգնության կարիք ունի: Իսկ մարդիկ կարող են օգնության կարիք ունենալ ամենատարբեր իրավիճակներում` մեկի լվացքի պարանն է կտրվում, մյուսի կատուն է մի տեղ մտնում ու «խցանվում», մի հիվանդ տատիկի պատուհանի փեղկն է բացվում ու չի փակվում: Փրկարարներն արձագանքում են անխտիր բոլոր զանգերին։
«Ամանորին 911 ծառայություն էր զանգահարել մի քաղաքացի և շուրջ 5 րոպե շնորհավորում էր ծառայության աշխատակիցների Նոր տարին և մաղթում էր, որ այս տարի ահազանգերը քիչ լինեն: Միայն խոսակցության վերջում ասաց` բա գիտե՞ք` Նոր Նորքում հրդեհ է բռնկվել»,-պատմում է ՏԿԱԻՆ-ի ՃԿԿ-ի պետ Հովհաննես Խանգելդյանը:
Զանգեր էլ կան, որ զվարճացնելու փոխարեն ՏԿԱԻՆ-ի աշխատակիցներին կարող են նյարդայնացնել կամ անիմաստ վատնել նրանց ժամանակը: Օրինակ` ինչ-որ մեկը զանգել է «911» ծառայություն և հայտնել՝ Երևանի խանութներից մեկում Ամանորի համար գնել է քաղցրավենիք արտադրող ընկերություններից մեկի կոնֆետներն ու երբ ուզել է ուտել, պարզվել է` մեջը միջատներ ու որդեր կան: Քաղաքացին մանրամասն նկարագրել է դեպքը, նշել հասցեն, իսկ երբ նրան հաղորդել են, որ ահազանգն ընդունված է, քաղաքացին հայտնել է` «շատ կարևոր է իմանալ, որ այդ ամենն իրականություն չէ, այլ իմ գլխում է»:
ՏԿԱԻՆ-ի ՃԿԿ-ում լինում են նաև կեղծ ահազանգեր:
«Մարդիկ պետք է ունենան պետական մտածողություն: Դուք չեք էլ պատկերացնում, թե որքան ռեսուրս է ծախսվում կեղծ ահազանգերի պատճառով»,-պատմում է Հովհաննես Խանգելդյանը:
Օգնություն, արիություն, փրկություն. այս բառերը յուրաքանչյուր փրկարարի գործունեության իմաստն ու խորհուրդն են հանդիսանում: Հայ փրկարարները հետևում են այդ խորհրդին: Ամենաուշը 10 րոպեում նրանք հասնում են այն վայր, որտեղից ստացվել է ահազանգը: Մնում է, որ քաղաքացիներն էլ իրենց հերթին հոգատար լինեն փրկարարների նկատմամբ։
Դեկտեմբերի 31-ից մինչև հունվարի 8-ը Տարածքային կառավարման և արտակարգ իրավիճակների նախարարությունում գրանցվել է 570 արտակարգ դեպք և պատահար: Դրանց մեծ մասը ճանապարհատրանսպորտային պատահարների և անանցանելի ճանապարհների հետ են կապված:
