ԵՐԵՎԱՆ, 8 հունվարի — Sputnik. Ամանորի գիշերը Քյոլնում տեղի ունեցած զանգվածային հարձակումներից հետո անցկացված հարցախույզի ընթացքում պարզվել է, որ հարցվածների 30 տոկոսը խուսափում է մարդաշատ վայրերից, հայտնում է ՌԻԱ Նովոստին` հղում անելով ARD հեռուստաալիքի հարցմանը:
Կանանց շրջանում այդ ցուցանիշը կազմել է 37 տոկոս, իսկ տղամարդկանց շրջանում` 21 տոկոս: Հարցվածների երկու երրորդը նշել է, որ Քյոլնի դեպքերից հետո իրենց վարքագիծը չի փոխվել:
Հասարակական վայրերում տեսախցիկների ավելացմանը կողմ է հանդես եկել հարցվածների 82 տոկոսը, 17 տոկոսը դեմ է տեսախցիկներին:
Ինչպես հայտնում է գերմանական Die Welt թերթը, Գերմանիայում ավելացել է ինքնապաշտպանական միջոցների պահանջարկը: Համացանցում սկսել են ակտիվորեն գնել պղպեղի փոշիով բալոնները: Ինչպես նշում է պարբերականը, քաղաքացիներն անվտանգության հետ կապված մտավախություն ունեն և փորձում են ամեն միջոց ձեռնարկել, որպեսզի պաշտպանված ու ապահով լինեն:
«Եթե նախկինում անպաշտպան լինելու երկյուղը սուբյեկտիվ բնույթ էր կրում, ապա այժմ մարդիկ խոսում են իրենց վախերի մասին` մտահոգվելով իրենց ու հարազատների անվտանգության համար», —գրում է պարբերականը` ներկայացնելով ինքնապաշտպանական ապրանքներ վաճառող խանութներից մեկի սեփականատիրոջ` Հելմուտ Կրեմզերի ասածը:
Քյոլնի ոստիկանությունը երեքշաբթի հայտնել է, որ միայն Ամանորի գիշերը 90 դիմում է ստացել կանանցից, որոնք բռնության են ենթարկվել «աֆրիկյան ու արաբական արտաքինով» տղամարդկանց կողմից։
