ԵՐԵՎԱՆ, 7 հունվարի- Sputnik. «Ֆորսաժ 7» մարտաֆիլմը, դերասաններ Ջոնի Դեպն ու Սանդրա Բուլոքն արժանացել են «Ժողովրդի ընտրություն» (People`s Choice 2016) պարգևին։ ԱՄՆ-ի ամենաժողովրդական մրցանակը հանձնելու արարողությունը կազմակերպել է CBS հեռուստաընկերությունը։
Մրցանակի դափնեկիրները որոշվում են առցանց քվեարկության արդյունքում, որին ավանդաբար մասնակցում են երկրպագուները։
«Ֆորսաժ 7» մարտաֆիլմը պարգևի է արժանացել երկու անվանակարգում` «սիրելի ֆիլմ» և «սիրելի էքշն»։
«Սիրելի կատակերգական դերասանուհի» անվանակարգում հաղթել է Մելիսա Մաքքարթին, երկրպագուները «սիրելի դրամատիկական դերասանուհի» են ճանաչել Դակոտա Ջոնսոնին, «էքշն ժանրում սիրելի դերասան» է դարձել Քրիս Հեմսվորտը։
People`s Choice պարգևը շնորհվում է 1975 թվականից։
