ԵՐԵՎԱՆ, 6 հունվարի- Sputnik. Նավթի գինը նվազել է` հասնելով անցած 11 տարիների նվազագույնին՝ ուժեղ դոլարի և Չինաստանի թույլ տնտեսական ցուցանիշների ֆոնին, գրում է The Wall Street Journal-ը:
Ժամը 13:45-ի դրությամբ Brent տեսակի նավթի փետրվարյան ֆյուչերսների արժեքը նվազել է գրեթե 4 տոկոսով և կազմել է մեկ բարելի համար 35,12 դոլար, WTI տեսակի փետրվարյան ֆյուչերսների արժեքը նվազել է մեկ բարելի համար մինչև 35,05 դոլար:
Մինչ այդ Brent-ը վաճառվել է մեկ բարելի համար 35,35 դոլարով, ինչը դարձել է 2004թ.-ի հուլիսից ի վեր ամենացածր ցուցանիշը:
Շուկան շարունակում է նվազման միտում ունենալ, նկատում է նավթի շուկայի վերլուծաբան Թամաշ Վարգան: «Ուժեղ դոլարը և Չինաստանից չհուսադրող տվյալները խորացնում են այդ միտումը»,- կարծում է նա:
Մերձավոր Արևելքում լարվածությունը նույնպես խորացնում է նավթի շուկայում իրավիճակը: Սաուդյան Արաբիայի և Իրանի հակամարտությունը ստիպում է անհանգստանալ նավթով ամենահարուստ տարածաշրջանից առաքումների մասին: Շատերը կարծում են, որ ՕՊԵԿ-ի ծանր քաշայինների միջև կտրուկ վատացած հարաբերությունները նշանակում են, որ կարտելը հաստատ չի նվազեցնի նավթի մշակումը, գրում է հրատարակությունը:
