ԵՐԵՎԱՆ, 6 հունվար — Sputnik. Փրկարարները հունվարի 6-ին մեկ տասնյակ մեքենա են դուրս բերել ձյան գերությունից, այդ թվում` շտապօգնության մեկ մեքենա, հաղորդում է ՀՀ ՏԿԱԻՆ մամուլի ծառայությունը։
Մեքենաներն արգելափակվել են Լոռու մարզում` Ստեփանավան-Տաշիր ավտոճանապարհին, Արագածոտնի մարզում` Ապարան-Նիգավան ավտոճանապարհին, Շենավան գյուղի մոտակայքում, Գեղարքունիքի մարզում` Նորատուս գյուղի սկզբնամասում, Զովաբեր գյուղի մոտակայքում, Վայոց Ձորի մարզի Եղեգնաձոր քաղաքում, Շիրակի մարզի Արթիկ-Մարալիկ ավտոճանապարհին, Կոտայքի մարզի Քաղսի գյուղի մոտ, Բջնի-Հրազդան ավտոճանապարհին, Լեռնանիստ գյուղի սկզբնամասում։
Իսկ Երևանի Կոնդ թաղամասի մոտակայքում շտապօգնության ավտոմեքենան արգելափակվել էր ձյան մեջ, տան ներսում կար հիվանդ, ում շտապօգնության ավտոմեքենային մոտեցնելու և շտապ հոսպիտալացնելու համար անհրաժեշտ էր փրկարարների օգնությունը: Դեպքի վայր էր մեկնել ՀՆՓԱԻԿ փրկարարական ջոկատը: Հրշեջ-փրկարարները ՇՕ «թիվ 02» ավտոմեքենան դուրս են բերել ձյան արգելափակումից, իսկ փրկարարները տան վատառողջ բնակչին՝1950 թ. ծնված Ս. Ս.-ին պատգարակով մոտ 400 մ. մոտեցրել են ՇՕ-ին: Վերջինս հոսպիտալացվել է «Էրեբունի» ԲԿ:
