Գոհար Սարգսյան, Sputnik.
Քրիստոսն իր աշակերտներին քարոզել է. «Որ տունը մտնեք, խաղաղություն քարոզեք այդ տանը»:
Քրիստոսի Հարությունից հետո նրա աշակերտները շրջում էին տներով ու տարածում իրենց վարդապետի խոսքը: Այսպես հիմք դրվեց տնօրհնեքի արարողությանը: Սուրբ ծննդին ու Սուրբ Հարությանը հաջորդող օրերին եկեղեցու սպասավորներն այցելում են հավատացյալներին, օրհնում նրանց տներն ու բնակիչներին, նաև տան բարիքները` աղը, հացն ու ջուրը: Դրանից հետո քահանան օրհնված ջուրը ցողում է բնակարանի 4 անկյուններն ու օջախի անդամների համար պահպանություն հայցում Աստծուց:
«Աղը, ջուրը և հացը մարդու կեցությունն ապահովող բաղադրիչներն են: Այդ պատճառով էլ եկեղեցու հոգևոր սպասավորները հենց դրանք են օրհնում: Հետո օրհնված աղն ու ջուրը օգտագործվում են ճաշատեսակների մեջ»,-ասում է Տեր Եսայի քահանա Արթենյանը:
Տնօրհնեքի արարողության համար տարվա ընթացքում սահմանափակում չկա: Դրա նպատակն ու իմաստը ընդգծվում է բնակարանամուտի ժամանակ ընթերցվող ավետարանական հատվածում. «Այսօր այս տան համար փրկություն եղավ…, որովհետև Մարդու որդին եկավ փնտրելու և փրկելու կորածին»:
Եկեղեցական կարգն ու կանոնները սահմանափակումներ չեն դնում արարողության կատարման քանակի հարցում: «Ամիսներ առաջ մենք տեղափոխվեցինք մեր նոր բնակարան, և ցանկություն առաջացավ քահանային հրավիրել տունն օրհնելու: Կարծում եմ՝ դա կնպաստի, որ ողջ տարվա ընթացքում ընտանիքում խաղաղություն, սեր և համերաշխություն տիրի»,-ասում է Անահիտ Հարությունյանը, ով պատրաստվում է քահանային խնդրել այս տարի էլ իրենց տունն օրհնել:
Սակայն քիչ չեն նաև դեպքերը, երբ մարդիկ տնօրհնեք են կազմակերպում չգիտակցելով ու չհասկանալով արարողության իմաստն ու խորհուրդը: Այդ դեպքում տնօրհնեքը դառնում է պայմանականությունների ու կարծրատիպերի հերթական արտահայտչամիջոցը, որը շարունակվում է ճոխ կերուխումով ու ավարտվում աղմկոտ քեֆ-ուրախությամբ:
Սակայն վերջին տարիներին նկատելիորեն ավելացել է իրենց տներն օրհնելու ցանկություն հայտնող այն մարդկանց թիվը, ովքեր հարցին գիտակցաբար են մոտենում ու խորապես հասկանում են արարողության հոգևոր նշանակությունը: Տեր Եսայի քահանա Արթենյանն այդ միտումը պայմանավորում է Հայ առաքելական եկեղեցու քարոզչությամբ ու այս ուղղությամբ տարվող ակտիվ աշխատանքով:
