ԵՐԵՎԱՆ, 1 հունվարի — Sputnik. Արդեն երրորդ օրն է՝ Երևանում անընդհատ ձյուն է տեղում: Չդադարող ձյունը կաթվածահար է արել քաղաքի երթևեկությունը, տաքսու վարորդները հրաժարվում են ուղևորներին տեղափոխել քաղաքի բարձրադիր թաղամասեր, որովհետև համոզված չեն, որ անվտանգ տեղ կհասնեն: Իսկ եթե որևէ վարորդ, ի վերջո, համաձայնում է, ապա սովորականից գրեթե կրկնակի շատ վարձավճար է պահանջում: Երևանցիները գրոհում են կանգառին մոտեցող տաքսիները, վարորդի մերժումը լսելուց հետո հուսահատ նետվում դեպի հաջորդ մեքենան:
Միևնույն ժամանակ Երևանի քաղաքապետարանի տեղեկատվության և հասարակայնության հետ կապերի վարչությունը հայտարարություն է տարածում և վստահեցնում, որ սանմաքրման ձեռնարկություններն աշխատում են արտակարգ ռեժիմով:
«Տեղացող աննախադեպ ձյան պայմաններում մայրաքաղաքի համապատասխան բոլոր ծառայություններն արդեն երրորդ օրն է շարունակում են աշխատել արտակարգ ռեժիմով: Վերջիններս շուրջօրյա ժամանակացույցով շարունակում են համապատասխան հատուկ տեխնիկայի միջոցով մաքրել մայրաքաղաքի գլխավոր և երկրորդական փողոցները: Փողոցների մաքրման աշխատանքներին զուգահեռ, շարունակվում են նաև մայթերի, կանգառասրահների աղի և ավազի խառնուրդով մշակման աշխատանքները: Տեղերում ընթացող աշխատանքները վարչական շրջանների ղեկավարների շուրջօրյա վերահսկողության տակ են»,- նշված է քաղաքապետարանի հայտարարության մեջ:
