ԵՐԵՎԱՆ, 31 դեկտեմբերի — Sputnik. Հայաստանի նախագահ Սերժ Սարգսյանը շնորհավորական ուղերձ է հղել Գեորգի Կվիրիկաշվիլուն՝ Վրաստանի վարչապետի պաշտոնն ստանձնելու կապակցությամբ, հայտնում են ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչությունից։
Նախագահը նշել է, որ երկու երկրների միջև ավանդական և բարեկամական երկխոսությունը, փոխշահավետ գործընկերությունն ու բազմաբովանդակ համագործակցությունը բխում են երկու ժողովուրդների հազարամյակներով հղկված բարիդրացիական հարաբերություններից:
«Լիահույս եմ, որ երկուստեք գործադրվող ջանքերի շնորհիվ դրանք այսուհետ ևս կշարունակեն զարգանալ լիակատար փոխվստահության մթնոլորտում` նպաստելով մեր բարեկամ երկրների և ժողովուրդների բարեկեցությանն ու առաջընթացին»,-ասված է ՀՀ նախագահի շնորհավորական ուղերձում:
Նշենք, որ դեկտեմբերի 30-ին Վրաստանի նախագահ Գեորգի Մարգելաշվիլին ստորագրել է Գեորգի Կվիրիկաշվիլուն երկրի վարչապետի պաշտոնում նշանակելու հրամանագիրը։
