ԵՐԵՎԱՆ, 31 դեկտեմբերի — Sputnik. Երկրի կրթության և գիտության նախարարությունն արգելել է տոնածառեր տեղադրել դպրոցներում և բուհերում: Այս մասին համապատասխան կարգադրություն է արել նախարար Նուրիդին Սաիդը:
«Կտրականապես արգելվում է եղևնիների հատումն ու ցանկացած տիպի եղևնիների տեղադրումը, ինչպես նաև՝ հրատեխնիկայի կիրառումը, տոնական ճաշկերույթը, նվերներն ու ռեստորաններում անցկացվող տոնական միջոցառումները», — նշված է նախարարի կարգադրության մեջ:
Գերատեսչությունը նաև խորհուրդ է տվել տոների ընթացքում մշակութային ու սպորտային միջոցառումներ կազմակերպել ուսումնական հաստատություններում:
Բացի այդ, նախարարի կարգադրության մեջ նշվում է, որ երկրում գործող ուսումնական հաստատություններում 2015 թվականի դեկտեմբերի 25-ից 31-ը և 2016 թվականի հւնվարի 1-ին պետք է տվյալ ուսումնական հաստատության պատասխանատու անձինք հերթապահություն իրականացնեն, դպրոցներում պետք է պահպանվեն հակահրդեհային անվտանգության ու քաղաքացիների անվտանգության պայմանները:
Առաջին անգամ նման կարգադրություն է արվել 2013 թվականին: Այն ժամանակ ասվում էր, որ Տաջիկստանի դպրոցականներին ու ուսանողներին Նոր տարվա կապակցությամբ թույլատրվում է մշակութային, սպորտային, ասմունքի ու նկարչության միջոցառումներ անցկացնել, սակայն բոլոր միջոցառումները պետք է ավարտվեն մինչև ժամը 15:00-ն: Տոնածառերի տեղադրումը կրկին արգելվել էր, և նշվել էր, որ ցանկալի չեն նաև ավանդական թեյախմությունները:
