ԵՐԵՎԱՆ, 29 դեկտեմբերի- Sputnik. Շախմատի աշխարհի չեմպիոն, նորվեգացի Մագնուս Կառլսենը դարձել է Քաթարում տեղի ունեցած մրցաշարի հաղթող, հաղորդում է Ռ-Սպորտը։
Եզրափակիչ տուրում նորվեգացին ոչ-ոքի է խաղացել ռուս գրոսմայստեր Վլադիմիր Կրամնիկի հետ և հավաքել յոթ միավոր։ 9 տուրից հետո նույնքան միավոր է վաստակել չինացի Յույ Յանյին, ով սպիտակ խաղաքարերով հաղթանակ է տարել ամերիկացի Ուեսլի Սոյի նկատմամբ։
Մրցաշարի հաղթողը որոշվել է թայ-բրեքում, որը կազմված է եղել երկու բլից պարտիաներից։ Երկու պարտիաներում էլ հաղթանակ է տարել աշխարհի գործող չեմպիոնը։
Կառլսենին և Յանյիին 6,5 միավորով հետևում են միանգամից հինգ շախմատիստներ, որոնց շարքում են ռուս Վլադիմիր Կրամնիկը, Սանան Սյուգիրովը և Սերգեյ Կարյակինը։ Լավագույն լրացուցիչ ցուցանիշների շնորհիվ երրորդ տեղն է զբաղեցրել աշխարհի 14-րդ չեմպիոն Կրամնիկը։
