Հարյուրավոր մարդիկ հրաժեշտ տվեցին լրագրող Նաջի ալ Ջերֆին, ով ֆիլմ էր նկարահանում «Իսլամական պետություն» խմբավորման հանցագործությունների մասին և սպանվել է Թուրքիայում դեկտեմբերի 28-ին
Deutsche Welle թերթը հայտնում է, որ Նաջի ալ Ջերֆը վերջին շրջանում աշխատում էր «Իսլամական պետություն» ահաբեկչական խմբավորման հանցագործությունները պատմող ֆիլմի վրա։ Ալ Ջերֆը նաև Սիրիայում ընթացող պատերազմի մասին ֆիլմ էր նկարահանել։ Նա եղել է նաև Hentah թերթի գլխավոր խմբագիրը։ Ալ Ջերֆը 37 տարեկան էր, ուներ երկու երեխա։
Ալ Հադաս հեռուստաալիքը, ներկայացնելով խմբավորման հայտարարությունը, հայտնել էր, որ լրագրողի սպանության պատասխանատվությունը ստանձնել է ԻՊ-ն։
«Իսլամական պետության» գրոհայինները նոյեմբերին ստանձնել էին Թուրքիայի հարավ-արևելքում գտնվող Շանլիուրֆա գավառում երկու սիրիացի լրագրողների սպանության պատասխանատվությունը։ Իբրահիմ Աբդուլկադիրին ու Ֆիրազ Համադիին սպանել էին վարձակալված բնակարանում, նրանք աշխատում էին «Այն Վաթան» թերթում, որը լույս էր տեսնում արաբերեն։ Թուրքական ԶԼՄ-ների տեղեկատվության համաձայն, լրագրողները սիրիական ազատ բանակի անդամ էին և «Իսլամական պետության» դեմ ուղղված հոդվածներ էին գրում, ինչի համար էլ բազմաթիվ սպառնալիքներ էին ստացել խմբավորման գրոհայինների կողմից։
