ԵՐԵՎԱՆ, 29 դեկտեմբերի — Sputnik. Սկանդինավիայի շրջաններից Միջերկրական ծով ներթափանցող արկտիկական օդային հոսանքները հզոր ցիկլոն կառաջացնեն, որը Հայաստանի տարածք կթափանցի Նոր տարվա նախաշեմին: Այս մասին Sputnik Արմենիային ասաց ՏԿԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը:
Այդ ցիկլոնի ազդեցության գոտում կգտնվի ամբողջ Կովկասը։ Դեկտեմբերի 30-ից մինչև հունվարի 2-ը սպասվում են ձյան առատ տեղումներ, բուք, մերկասառույց, տեսանելիության անկում: Դեկտեմբերի 31-ից հանրապետություն կներթափանցեն արկտիկական հոսանքներ, ցերեկային ժամերին օդի ջերմաստիճանը կնվազի 8-10 աստիճանով:
Դեկտեմբերի 31-ին և հունվարի 1-ին ցերեկային ժամերին ջերմաստիճանը —2 աստիճանից բարձր չի լինի: Օդերևութաբանները կանխատեսում են, որ հունվարի 1-ից հետո հանրապետությունում օդի ջերմաստիճանի լուրջ նվազում կգրանցվի։
Yandex որոնողական համակարգի եղանակի կանխատեսման բաժնում նշված է, որ Երևանում ձյուն կտեղա հինգշաբթի օրը` դեկտեմբերի 31-ին, իսկ հունվարի 2-ից օդի ջերմաստիճանը կսկսի նվազել և կիրակի կհասնի —14 աստիճանի։
