Անի Լիպարիտյան, Sputnik.
Ողջ աշխարհի երեխաները որոշ ժամանակ հավատում են Ձմեռ պապին, ով թեև տարին մեկ անգամ, բայց կարող է կատարել նրանց բոլոր ցանկությունները և հանձնել երկար սպասված նվերը:
Երեխաների մտքերը և ցանկությունները չեն կարող անտարբեր թողնել ոչ ոքի:
Իհարկե, բոլոր փոքրիկները չէ, որ հավատում են ճերմակամորուս հրաշագործին` կասկածներ ունենալով, որ այդ կարևոր առաքելությունը կատարում են ծնողները, տատիկներն ու պապիկները: Սակայն կան երեխաներ, որոնք ի սրտե ցանկանում են, որպեսզի հենց Ձմեռ պապը բերի և տոնածառի տակ թողնի բաղձալի նվերը:
Sputnik Արմենիա պորտալը ոտք է դնում մանկական երազանքների աշխարհ և ներկայացնում նրանց ցանկությունները, իսկ երազանքները, ինչպես հայտնի է, պետք է կատարվեն.
«Բարև, սիրելի Ձմեռ պապիկ: Ես ամեն տարի ստացել եմ այն, ինչ ես եմ ուզել: Այս տարի ես լավ եմ սովորել, օգնել եմ բոլորին, որպեսզի նորից ստանամ քո հրաշալի նվերներից մեկը: Ես միայն մի բան եմ քեզ խնդրում: Խնդրում եմ նվերներ տանես այն երեխաներին, որոնք ծնողներ չունեն և որոնք քո նվերների կարիքը շատ ունեն: Խնդրում եմ նրանց ուրախություն պարգևիր» (գրում է 9 տարեկան Հայկը)։
«Սիրելի Ձմեռ պապիկ, ես 6 տարեկան Հովհաննեսն եմ: Այս տարի ես շատ լավ եմ սովորել, դրա համար ուզում եմ, որ ինձ բերես վիդեո պրիստավկա, իսկ քույրիկիս համար՝ տիկնիկ»:
Վերջում Հովհաննեսը նշել է հայրիկի հեռախոսահամարը, որպեսզի նվերը ճիշտ հասցեով տեղ հասնի:
«Սիրելի ու հարգելի Ձմեռ պապ, քեզ դիմում է Ալեքս Բարսեղյանը: Խնդրում եմ ինձ բերես Լեգո վիշ, Փլեյդո և գեղեցիկ շորեր»:
Երկու եղբայրներ` երեք տարեկան Նարեկը և հինգ տարեկան Դավիթը Ձմեռ պապից խնդրել են վիշապ, ձուկ, հրացան և մեծ ռոբոտ: Կարճ ու կոնկրետ:
Իհարկե, աղջիկների պահանջները բոլորովին այլ են.
«Սիրելի Ձմեռ պապ, ինչպե՞ս ես: Ես 8 տարեկան Նաստյան եմ: Ես երկու քույրիկ ունեմ: Սովորում եմ դպրոցում: Ես երկու լավագույն ընկերուհի ունեմ՝ Էլինան և Գոհարիկը: Ես ամբողջ տարին ինձ լավ եմ պահել: Եթե կարելի է, ինձ բեր սև ականջօղեր, փականով բլոկնոտ և հարիչ»:
«Բարև, Ձմեռ պապ: Քեզ գրում է Անուլյան: Ես ուզում եմ խելացի աղջիկ լինել, չբարկացնել մայրիկիս ու հայրիկիս: Հետո էլ ուզում եմ ինքնուրույն պատրաստել դասերս, որ մայրիկս չվշտանա: Խնդրում եմ, որ ինձ բերես ռետինով գրիչ, որ երբ սխալ գրեմ, ջնջեմ: Շնորհակալություն, որ դու կաս»:
Իսկ ինչ-ոչ մեկը շնիկ է խնդրում և երջանկություն` բոլորին
Հնարավոր է` երեխային դժվար է բացատրել, որ հարմար չէ տանը շուն, կատու և այլ կենդանի պահել, չէ՞ որ նա «Կառլսոնի» Մանչուկի նման շատ է ուզում շուն ունենալ, և նա չի հասկանում, թե իրեն ինչու կենդանի չեն նվիրում:
«Ինձ թվում է, որ ամբողջ կյանքս կապրեմ առանց շնիկի,- տխուր ասաց Մանչուկը, երբ բոլորը շրջվեցին։- Հայրիկ, դու ունես մայրիկին, իսկ դու ունես հայրիկին։ Իսկ ես ոչ ոք չունեմ»,- Աստրիդ Լինդգրենի հայտնի հեքիաթի այս տողերը հիշում են բոլոր մեծահասակները։ Չէ՞ որ նրանք էլ երազել են շնիկի կամ փիսիկի մասին, այլ ոչ թե մեքենայի կամ տան, պարզապես մոռացել են այդ մասին։
Նման դեպքում փորձեք փոխզիջման գնալ կամ այլընտրանք գտնել. հոգեբանները խորհուրդ են տալիս նվիրել մեծ փափուկ խաղալիք:
Եվ վերջում: Եթե նույնիսկ երեխան չի հավատում Ձմեռ պապին կամ կասկածում է նրա գոյությանը, դուք ինքներդ կարող եք հեքիաթի հերոս դառնալ և նրան երջանկություն պարգևել:
Չէ՞ որ գլխավորը սերն է, քնքշանքը և փոքրիկի՝ երջանկությունից փայլող աչքերը:
