Մոսկվայի շամպայն-գինիների կոմբինատը մայրաքաղաքի ամենախոշոր գործարաններից է: Խմիչքն այստեղ արտադրվում է հատուկ տեխնոլոգիայով: Շամպայնը ստանում են ընդամենը երկու ամսում, այլ ոչ թե երեք տարում, ինչպես դասական մեթոդի դեպքում: Կուպաժը կազմում են աշխարհի առաջատար գինի արտադրողներից՝ Ֆրանսիայից, Իտալիայից, Չիլիից, Արգենգտինայից, ինչպես նաև Ռուսաստանից:
«Կուպաժը յուրաքանչյուր ձեռնարկության գաղտնիքն է: Գինիների տարբեր տոկոսային հարաբերակցությունը ստեղծում է այն յուրահատուկ համը, որը գնորդը հետագայում կզգա խմիչքը վայելելիս: Խմորման արդյունքում ստեղծվում է բնական ծագման ածխաթթու, որն էլ ձևավորում է շամպայնը»,- ՌԻԱ Նովոստիին պատմել է Մոսկվայի կոմբինատի գլխավոր տեխնոլոգ Մարինա Վասիլչենկոն:
Կուպաժի արտադրամասից պատրաստի գինին տեղափոխվում է շամպայնացման արտադրամաս. այստեղ դրան ավելացնում են խմորիչներ և լիկյոր: Խմորումը տևում է շուրջ 20 օր հերմետիկ փակ ապարատներում: Այդ ընթացքում խմիչքում բնական ճանապարհով ձևավորվում է ածխաթթու:
Ավտոմատացված կենտրոնի մասնագետները հետևում են, որպեսզի շամպայնը ձեռք բերի անհրաժեշտ համ, գույն և բույր: Նրանք տիրապետում են հնեցման չափանիշների մասին ողջ տեղեկատվությանը, խոսքը տարաներում ճշգրիտ ճնշման, անհրաժեշտ ջերմաստիճանի և գինու հոսքի արագության մասին է:
Պատրաստի խմիչքը տեղափոխվում է շշալցման արտադրամաս: Մեկ ժամվա ընթացքում շշալցվում է շուրջ 16 հազար շիշ շամպայն: Հսկիչ օպերատորները հետևում են ապակե շշերին հատուկ սարքերի օգնությամբ: Շշալցման մակարդակը ֆիքսում են ռենտգենյան ճառագայթները:
Մոսկվայի կոմբինատում օրական արտադրվում է շուրջ 117 հազար շիշ շամպայն, իսկ տարեկան՝ շուրջ 43 միլիոն:
