ԵՐԵՎԱՆ, 25 դեկտեմբերի — Sputnik. Հայկական արժույթի օբյեկտիվ փոխարժեքն ավելի ցածր է, քան սահմանել է Հայաստանի կենտրոնական բանկը, Sputnik Արմենիա պորտալին ասաց տնտեսական գիտությունների թեկնածու, դոցենտ Մարիամ Ոսկանյանը։
Հայաստանի կենտրոնական բանկի կողմից սահմանած ընթացիկ փոխարժեքը մեկ դոլարի դիմաց 482.55 դրամ է կազմում։
Նրա խոսքով` հաշվի առնելով, որ ռուսական ռուբլին, ինչպես նաև հետխորհրդային տարածքի մյուս արժույթներն անկում են ապրում, իսկ Ռուսաստանի և Հայաստանի տնտեսություններն էլ սերտորեն կապված են միմյանց, դրամը պետք է վաղուց անկում ապրեր և մոտենար մեկ դոլարի դիմաց 600 դրամ ցուցանիշին։
«Մեր կենտրոնական բանկը շարունակում է կայուն փոխարժեքի քաղաքականությունը` չխնայելով տնտեսությունը։ Ընդ որում, արտահանումը վերջնականապես նվազել է, տնտեսությունը ռեցեսիայի վիճակում է, եկամուտներն ընկնում են, տրանֆերտները `նվազում», — ասել է Ոսկանյանը։
Նրա խոսքով` շուկայական փոխարժեքի ձևավորման բացակայության պայմաններում դժվար է ասել` ինչ կլինի դրամի հետ առաջիկայում։
«Ըստ տրամաբանության, այն պետք է անկում ապրի, սակայն կրկին հաշվի առնելով ԿԲ-ի քաղաքականությունը` ես չեմ ուզում որևէ կանխատեսում անել», — ասաց Ոսկանյանը։
Նրա խոսքով` դրամի ամրապնդումը ձեռնտու է նախևառաջ հայ ներկրողներին։
Վիճակագրական տվյալների համաձայն, Հայաստանի ներքին ապրանքաշրջանառության ծավալը 2015 թվականի 10 ամսում կազմել է շուրջ 3 900,9 մլն դոլար` անցյալ տարվա նույն ժամանակահատվածի համեմատ կրճատվելով 20,4%ով։
