Արմենուհի Մխոյան, Sputnik.
ԵՐԵՎԱՆ, 25 դեկտեմբերի — Sputnik. «Միսս երկրագունդ» գեղեցկության մրցույթի պատմության մեջ առաջին անգամ Հայաստանը ներկայացնող գեղեցկուհին վստահեցնում է, որ հաջորդ տարին՝ 2016 թվականն ավելի արդյունավետ ու բեկումնային կլինի: Գյումրեցի Լիլիթ Մարտիրոսյանը Վիեննայում նոյեմբերի 18-ից դեկտեմբերի 6-ը կայացած գեղեցկության մրցույթից հետո արդեն բազմաթիվ հրավերներ ու առաջարկներ է ստացել:
«Վիեննայից հետո մի շարք առաջարկներ եմ ստացել, որպեսզի Հայաստանը ներկայացնեմ տարբեր մրցույթներում: Համաշխարհային գեղեցկության և նորաձևության լիգայի նախագահ Աշոտ Խաչատրյանի շնորհիվ ես «Միսս երկրագունդ» գեղեցկության մրցույթին մասնակցելու հնարավորություն ստացա: Բացի մոդելային ցուցադրություններից ու գեղեցկության մրցույթներից, ստացել եմ նաև հեռուստատեսային շոուներ վարելու առաջարկ Գերմանիայից, իսկ Փարիզի և Վիեննայի մոդելային գործակալություններից կան առաջարկներ, որոնք դեռ քննարկման փուլում են»,- նշեց Լիլիթը՝ առայժմ չցանկանալով բացել փակագծերը:
«Միսս երկրագունդ» գեղեցկության մրցույթին Հայաստանի դրոշն առաջին անգամ ներկայացնելը մեծ հաղթանակ էր»,– ասում է Լիլիթը` միաժամանակ նկատելով, որ գեղեցկության տիտղոսի համար պայքարող 92 մասնակցի շարքում հայտնվել է լավագույն ութնյակում, իսկ «Տաղանդներ» կոչվող փուլում ներկայացրել է իր նկարչական տաղանդը:, I am woman of the Earthե աշխատանքով Լիլիթը հայտնվել է լավագույն հնգյակում:
«Մեծ հպարտություն եմ զգում, քանի որ ֆավորիտների թոփ ութնյակում հայտնվելն առաջին անգամ այդ մրցույթին ներկայացնող երկրի համար բավական լավ արդյունք է: Մրցույթին հաղթեց Ֆիլիպինները ներկայացնող գեղեցկուհին, բայց ինձ համար ֆավորիտը Ուկրաինայի ներկայացուցիչն էր: Չնայած սա մրցույթ էր, բայց շատերի հետ եմ ընկերացել: Նույնիսկ, երբ ես այդ ընթացքում հիվանդացա, Ռուսաստանի ու Ուկրաինայի ներկայացուցիչները հոգ էին տանում: Սա ցույց էր տալիս, որ նրանք ոչ միայն արտաքնապես էին գեղեցիկ, այլ նաև ներքին գեղեցկություն ունեին: Այս, ինչպես նաև 2015 թվականին «Թոփ մոդել Հայաստան» մրցույթին «Թոփ մոդել» տիտղոսին արժանանալը ճակատագրական դարձավ ինձ համար, բայց հուսամ, որ դեռ ամեն ինչ առջևում է»,-ասում է Լիլիթ Մարտիրոսյանը:
«Շատերը գիտեին, որ Հայաստանն առաջինն է պաշտոնապես ընդունել քրիստոնեությունը, մոտենում էին ու հպարտանալով նշում, որ գիտեն Հայաստանի մասին, գիտեն, որ ունենք Շառլ Ազնավուր ու հպարտանալու շատ մարդիկ ու առիթներ»,- նշեց Լիլիթ Մարտիրոսյանը՝ ավելացնելով, որ այս մրցույթներին մասնակցելու համար հովանավորներ չի ընդունում. միակ հովանավորն իր ընտանիքն է: Լիլիթը պատրաստվում է ուսումը շարունակել Լոնդոնում, ինչը չի խանգարի իր մոդելային գործունեությանը, իսկ ընտանիք կազմելու մասին դեռ չի մտածում:
Որպես մոդել Լիլիթի նորամուտը եղել է 2012 թվականին՝ «Միսս Հայաստան» մրցույթով, այստեղ էլ առաջին անգամ Լիլիթին նկատել է «Ատեքս» մոդելային գործակալության տնօրեն Օլգա Լավրիենկոն և երկարոտն հայուհուն, յուրահատուկ դիմագծերով օժտված գեղեցկուհուն համագործակցության առաջարկություն է արել: 2015 թվականին «Թոփ մոդել Հայաստան» մրցույթը ճակատագրական դարձավ գեղեցկուհու համար՝ նա արժանացավ «Թոփ մոդել» տիտղոսին, որից հետո էլ ստացավ «Միսս Երկրագունդ» մրցույթին Հայաստանը ներկայացնելու առաջարկը:
Լիլիթը մրցույթներին մասնակցում է անբացատրելի ոգևորությամբ, այնպես, ինչպես անբացատրելի են կյանքի հրաշքները, երբ տարիներ առաջ փոքրիկ Լիլիթին 1988 թվականի ահավոր երկրաշարժի փլատակներից հրաշքով փրկեց մայրը, ում առաջարկով էլ տարիներ անց մոդելային իր կարիերան սկսեց սևաչյա գեղեցկուհին:
