ԵՐԵՎԱՆ, 25 դեկտեմբերի — Sputnik. Երգչուհի Մադոննան դատարանի միջոցով ստիպել է, որ ավագ որդին` Ռոկկո Ջոնն իր հետ անցկացնի արձակուրդները։ Երգչուհին ցանկանում է նյույորքյան հանգիստն անցկացնել 15-ամյա պատանու հետ։ Տղան դեմ է մոր որոշմանը։ Նա ցանկանում է տոներն անցկացնել հոր` Գայ Ռիչիի հետ, հայտնում է NY Post-ը։
Նյու Յորքի բարձրագույն դատարանի ներկայացուցիչները ստիպել են տղային ենթարկվել մոր կամքին։ Շուտով նա մոր հետ հանդիպում կունենա փաստաբանի ներկայությամբ և այդ ժամանակ կհայտնի իր վերջնական որոշումը։
Հայտնի է, որ Ռոկո Ջոն Ռիչին երկու ամիս ճանապարհորդել է մոր հետ նրա վերջին շրջագայության ժամանակ։
«Հասկանալի է` ինչու է նա որոշել հանգստանալ մորից։ Նա մոր հետ լավ հարաբերությունների մեջ է, սակայն թինեյջերները միշտ ավելի շատ ազատության են ձգտում», — ասել է դերասանուհու մտերիմներից մեկը։
Ռոկո Ջոն Ռիչին ծնվել է 2000 թվականի օգոստոսի 11-ին։ 2001 թվականին երգչուհին պաշտոնապես ձևակերպել է հարաբերությունները տղայի հոր` ռեժիսոր Գայ Ռիչիի հետ, իսկ 2008 թվականին զույգն ամուսնալուծվել է։ 2015 թվականի հուլիսի 31-ին Ռիչին ամուսնացել է մոդել Ջեկի Էյնսլիի հետ, որի հետ հանդիպում էր 2010 թվականից։
