ԵՐԵՎԱՆ, 25 դեկտեմբերի — Sputnik. Հայաստանը հաջորդ տարեսկզբին միանալու է Ձյան համաշխարհային օրվա միջոցառումներին, այս անգամ կազմակերպիչները նպատակ են դրել երեխաներին տանել դեպի ձյուն, Sputnik Արմենիա միջազգային մամուլի կենտրոնում ասուլիսի ժամանակ հայտնեց Հայաստանի դահուկային սպորտի ֆեդերացիայի գլխավոր քարտուղար Գագիկ Սարգսյանը։
Նա խոստացավ, որ հունվարի 17-ին Ծաղկաձորում նշվող Ձյան օրը բոլոր երեխաներին հնարավորություն կտրվի սահել դահուկներով։ Կլինեն նաև հայ մարզիկների ցուցադրական ելույթներ, որոնք դահուկային սպորտի նկատմամբ հետաքրքրությունը մեծացնելու լավագույն ձև են։
Նա նշեց, որ ֆեդերացիայի հիմնական նպատակը խորհրդային տարիների դահուկային լավ ավանդույթները վերականգնելն է։ Առավել ևս, որ Հայաստանում դրա համար բոլոր բնական պայմանները կան, և դա ոչ միայն ֆեդերացիայի, այլև Հայաստան այցելող բազմաթիվ օտարերկրյա հյուրերի և փորձագետների կարծիքն է։ Եվ մարզիկներն այստեղ ցանկության դեպքում շատ լավ մարզվում ու արդյունքներ են գրանցում։
«Ունենք դահուկավազորդ Սերգեյ Միքայելյան, ով 2015 թվականին Ալմաթիի աշխարհի մինչև 23 տարեկանների առաջնությունում գրավեց 10-րդ տեղը, ինչը լուրջ արդյունք է։ Լեռնադահուկային սպորտում կան տաղանդավոր երիտասարդ մարզիկներ, որոնք հիանալի արդյունքներ կարող են ունենալ, կարող են գրանցել նույն արդյունքները, ինչ մենապայքարային մարզաձևերի մարզիկները»,- ընդգծեց Սարգսյանը։
Սարգսյանը հայտնեց, որ միջոցներ են ձեռնարկվում, որպեսզի հայ դահուկորդները մարզվեն ողջ տարին, այլ ոչ միայն ձմռան ամիսներին։ Մասնավորապես, անցկացվում են անվադահուկային մարզաձևի առաջնություններ, Հայաստանին նույնպես տրված է նման վարկանիշային առաջնություններ անցկացնելու արտոնություն, և մարզիկներն այդպես իրենց վարկանիշները հավաքում են անգամ ամռանը։ Այս տարի ամռանը Հայաստանում նման վարկանիշային առաջնություն կանցկացվի։
Գրանցվել են նաև Հայաստանի լեռնադահուկային և դահուկավազքի վազքուղիները, ինչի շնորհիվ մեր երկում վարկանիշային մրցումներ են անցկացվում։
Հայաստանում, օրինակ, հունվարին կանցկացվի զարգացող երկրների դահուկային սպորտի առաջին առաջնությունը։
Սպորտի և երիտասարդության հարցերի նախարարի խորհրդական Տիգրան Միքայելյանն իր հերթին նշեց, որ ձմեռային մարզաձևերը Հայաստանում լավ զարգացած չեն նախ օբյեկտիվ պատճառներով. այստեղ քիչ է տևում ձմեռը, այդուհանդերձ լուրջ քայլեր կան։ Որպես նման օրինակ` նա նշեց Երևանում Գեղասահքի ժամանակակից դպրոցի բացումը։
