Վրաստանն առանց կառավարության կամ ժողովրդավարության արդյունքը

ԵՐԵՎԱՆ, 24 դեկտեմբերի– Sputnik. Վրաստանի վարչապետ Իրակլի Ղարիբաշվիլին դեկտեմբերի 23–ին հայտարարել է, որ լքում է պաշտոնը` հանուն երկրի բարօրության։  Այդ կապակցությամբ Sputnik Արմենիան զրուցել է Վրաստանի հարցերով փորձագետ, Հայաստանի կառավարման պետական ակադեմիայի տարածաշրջանային հետազոտությունների կենտրոնի գիտաշխատող Ջոնի Մելիքյանի հետ` իմանալու, թե ինչ ապագա է սպասվում Վրաստանին և ով կլինի մյուս վարչապետը։

Վրաստանի կառավարությունը հրաժարական է տվել

Դեռ անցյալ տարվանից, երբ Վրաստանում տնտեսական դժվարություններ սկսվեցին և ազգային արժույթն արժեզրկվեց, կառավարությունում տեղի ունեցան կադրային փոփոխություններ, որոնք չանդրադարձան նախարարների կաբինետի տնտեսական դաշինքի վրա։

Այդ կապակցությամբ միակ փոփոխությունն այն էր, որ էկոնոմիկայի նախարար Գեորգի Կվիրիկաշվիլուն նշանակեցին ԱԳՆ ղեկավար, իսկ նրա պաշտոնը զբաղեցրեց Թբիլիսիի նախկին փոխքաղաքապետ Դմիտրի Կումսիշվիլին։

Ակնկալվում էր, որ կառավարությունում փոփոխություններ տեղի կունենան հոկտեմբերի վերջին` ստեղծված տնտեսական իրավիճակից դուրս գալու համար։ Այնուամենայնիվ քչերն էին սպասում, որ դա տեղի կունենա Ամանորի նախաշեմին։ Այսօրվա դրությամբ Վրաստանի վարչապետ Իրակլի Ղարիբաշվիլին հրաժարական է տվել, իսկ բոլոր նախարարները, Վրաստանի սահմանադրության համաձայն, հայտարարվել են պաշտոնակատար։

Կվիրիկաշվիլի՞, թե՞ Սերգեենկո…

Մինչև Նոր տարի խորհրդարանը վարչապետի պաշտոնում կներկայացնի նոր մարդու, իսկ նա իր հերթին 7 օրվա ընթացքում պետք է ներկայացնի կառավարության նոր կազմը և կառավարության ծրագիրը։

Վարչապետի պաշտոնի գլխավոր թեկնածուն Գեորգի Կվիրիկաշվիլին է, երկրորդ տեղում առողջապահության նախարար Դավիթ Սերգեենկոն է, ով անցած տարիներին կարողացել է լուրջ աշխատանք իրականացնել իր ոլորտում։ Կվիրիկաշվիլին բավական ակտիվ է եղել, և նրա ուղին ցույց է տալիս, որ Վրաստանի նախկին վարչապետ Բիձինա Իվանիշվիլին պատրաստել է նրան այդ պաշտոնի համար։

Իսկ ինչու՞ ոչ փոխվարչապետ և էներգետիկայի նախարար Կախա Կալաձեն

Կախա Կալաձեն այն մարդկանցից է, ով մտերիմ է Իվանիշվիլու հետ, բայց նա նույնպես չի տեսնում իրեն վարչապետի պաշտոնում։ Նա գիտի իր հավակնությունները և գիտի, որ որոշակի բարձունքների է հասել էներգետիկայի նախարարի պաշտոնում, բայց այնուամենայնիվ իր վրա չի վերցնի երկիրը կառավարելու բեռը։

Ղարիբաշվիլու հրաժարականն Իվանիշվիլու ուղի՞ն է

Իմ կարծիքով` Ղարիբաշվիլին հրաժարական է տվել Իվանիշվիլու խորհրդով, և նա անձամբ պատրաստ չէր, որ հենց հիմա կգնա։ Ամենայն հավանականությամբ, Ղարիբաշվիլին կվերադառնա այնտեղ, որտեղից սկսել է իր քաղաքական գործունեությունը։ Վերջին հետազոտությունները ցույց են տվել, որ «Վրացական երազանք» կոալիցիան թույլ դիրքեր է զբաղեցնում, և բնակչության 50 տոկոսից ավելին կամ դեմ է կամ հիասթափված կառավարությունից։

Հիշեցնեմ, որ 2013թ.–ին Իվանիշվիլին թողել է վարչապետի պաշտոնը, հեռացել քաղաքականությունից և անցել քաղաքացիական հատված, ստեղծել «Քաղաքացի» անունով հասարակական կազմակերպություն։ Ենթադրում եմ, որ Ղարիբաշվիլին կարող է գլխավորել այդ կազմակերպությունը և օգնելու է նոր վարչապետին և կոալիցիային։

Ղարիբաշվիլու կառավարման շրջանը համընկել է այնպիսի իրադարձությունների հետ, ինչպիսիք են Ուկրաինայի ճգնաժամը, Մերձավոր Արևելքի հուզումները, Ռուսաստանի դեմ պատժամիջոցները, ինչն, անկասկած, բացասական ազդեցություն է ունեցել Վրաստանի տնտեսության վրա։ Քանի որ Ղարիբաշվիլին պատրաստ չի եղել բոլոր այդ իրադարձություններին, և նրա վարկանիշն ընկել է, ապա 2016թ.–ի ընտրություններին պատրաստվող կոալիցիան վերապրանքանիշավորում է կատարել` փոխելով վարչապետին։

Վրաստանի` մուտքի արտոնագրի դյուրացման գործընթացները
 
Եվրամիությունը պատրաստ է չեղյալ հայտարարել մուտքի արտոնագրի ռեժիմը Վրաստանի համար։ Որոշման համաձայն` Վրաստանի քաղաքացիները կարող են 90 օրվա ընթացքում գտնվել շենգենյան գոտում։ Վիզայի ռեժիմը դյուրացնելու մասին ռուսական առաջարկն ուշացած էր։ Այնուամենայնիվ, ռուս–վրացական հարաբերություններում այդ միտումը կարելի է ողջունել։ Չէ՞ որ ռուս–վրացական հարաբերությունների բարելավումը դրական կանդրադառնա նաև հայ–վրացական հարաբերությունների վրա։

Հոդվածի հրապարակման պահին տեղեկատվություն ստացվեց Եվրամիության հետ Վրաստանի ասոցացման մասին համաձայնագրի վավերացման մասին։