ԵՐԵՎԱՆ, 24 դեկտեմբերի– Sputnik. Հայտնի սերբ ռեժիսոր Էմիր Կուստուրիցան հինգշաբթի ժամը 20։20-ին ժամանեց Երևան, հաղորդեց Sputnik Արմենայի թղթակիցը «Զվարթնոց» օդանավակայանից։
Կուստուրիցայի և նրա «The No Smoking Orchestra»-ի համերգը նախատեսված է դեկտեմբերի 25-ին Երևանի Կ. Դեմիրճյանի անվան մարզահամերգային համալիրում։
Հիշեցնենք, որ Կուստուրիցան Երևանում արդեն համերգ ունեցել է` «The No Smoking Orchestra»-ի հետ միասին նա Հայաստան էր ժամանել հինգ տարի առաջ։ Այն ժամանակ նա այցելել էր նաև Փարաջանովի տուն-թանգարան։
Սերբ կինոռեժիսոր Էմիր Կուստուրիցան արժանացել է Եվրոպայի խոշորագույն կինոփառատոների մրցանակների, որոնց թվում են Կաննի կինոփառատոնի 2 «Ոսկե արմավենիները»։ Կուստուրիցան Պատվո լեգիոնի շքանշանի ասպետ է, Սերբիայի Հանրապետության Գիտությունների և արվեստների ակադեմիայի արտասահմանյան անդամ։
Բացի ռեժիսոր լինելուց, Կուստուրիցան նաև «The No Smoking Orchestra» ֆոլք–ռոք խմբի անդամ է։
