ԵՐԵՎԱՆ, 24 դեկտեմբերի – Sputnik. Հայաստանի նախագահ Սերժ Սարգսյանն, ընդունելով Իրանի էներգետիկայի նախարար, հայ-իրանական միջկառավարական հանձնաժողովի իրանական կողմի համանախագահ Համիդ Չիթչիանին, հույս է հայտնել, որ երկկողմ համագործակցության օրակարգը հանձնաժողովի նիստի արդյունքում ավելի է հարստացել, ձեռք են բերվել նոր պայմանավորվածություններ, հայտնում է երկրի նախագահի մամուլի ծառայությունը։
Հայ-իրանական միջկառավարական հանձնաժողովի 13-րդ նիստը, որին մասնակցելու համար Երևան է ժամանել ԻԻՀ պատվիրակություն` հանձնաժողովի իրանական կողմի համանախագահ, ԻԻՀ էներգետիկայի նախարար Համիդ Չիթչիանի գլխավորությամբ, մեկնարկել է նախօրեին Երևանում։
Հայաստանի նախագահը ողջունել է հյուրին և նրա գլխավորած պատվիրակությանը՝ գոհունակությամբ արձանագրելով փաստը, որ հայ-իրանական միջկառավարական հանձնաժողովի նիստերի ժամանակացույցը չի խախտվում՝ նախորդ նիստից ուղիղ մեկ տարի անց Երևանում անցկացվում է հերթական՝ 13-րդ նիստը:
Բարեկամ Իրանի հետ Հայաստանի հարաբերությունների խորացման գործում Սարգսյանը մեծապես կարևորել է միջկառավարական հանձնաժողովի դերը և հանձնաժողովի համանախագահ, էներգետիկայի նախարար Համիդ Չիթչիանի անձնական ներդրումը:
«Ընդգծելով, որ Հայաստանը մեծապես կարևորում է բարեկամ Իրանի հետ հարաբերությունները, ՀՀ Նախագահը նշել է, որ երկու երկրների միջև հաստատված անկեղծ երկխոսությունն ու փոխադարձ վստահությունը ենթադրում են բարձրաստիճան փոխայցերի դինամիկայի պահպանում՝ համագործակցության երկկողմ օրակարգն ավելի ընդլայնելու և զարգացնելու նպատակով»,- ասված է հաղորդագրությունում:
Զրուցակիցները երկուստեք առանձնակի կարևորել են առևտրատնտեսական հարաբերությունների խթանման և այդ ոլորտում առկա մեծ ներուժը լիարժեքորեն օգտագործելու անհրաժեշտությունը: ՀՀ նախագահը և Համիդ Չիթչիանը հանդիպմանը հանգամանորեն քննարկել են Հայաստանի և Իրանի համար մեծ կարևորություն ունեցող համատեղ, այդ թվում՝ ենթակառուցվածքային ծրագրերի իրականացման ընթացքն ու նոր նախագծերի, փոխշահավետ ներդրումային ծրագրերի իրականացման հնարավորությունները:
«Սերժ Սարգսյանը և Համիդ Չիթչիանն անդրադարձել են նաև տարածաշրջանային համագործակցությանն առնչվող հարցերի: Այդ համատեքստում նրանք գոհունակությամբ են փաստել, որ իրականություն է դառնում Հյուսիս-հարավ էլեկտրաէներգետիկ ծրագիրը, ինչը ենթադրում է համապատասխան համակարգերի զուգահեռ աշխատանք Իրանի, Հայաստանի, Վրաստանի և Ռուսաստանի միջև»,- ասված է հաղորդագրությունում:
Իրանի էներգետիկայի նախարարի կարծիքով` Երևանում կայացած հիշյալ երկրների էներգետիկայի ոլորտի պատասխանատուների քառակողմ հանդիպումը կարևոր և արդյունավետ քայլ էր տարածաշրջանի այդ երկրների համերաշխության տեսանկյունից և նոր որակ է հաղորդում ինչպես երկկողմ, այնպես էլ բազմակողմ ձևաչափով համագործակցության զարգացմանը:
