ԵՐԵՎԱՆ, 24 դեկտեմբերի — Sputnik. Ուկրաինայի կառավարությունը որոշել է 2016 թվականի հունվարի 1-ից «համարժեք» պատասխան տալ Ռուսաստանին, հայտարարել է Ուկրաինայի վարչապետ Արսենի Յացենյուկը։
«Երկարատև խորհրդատվություններին ի պատասխան, ինչպես սպասվում էր, Ռուսաստանը առևտրային էմբարգո սահմանել ուկրաինական ապրանքների համար։ Սա Ռուսաստանի առաջին որոշումը չէ, սա համակարգային ճնշում է Ուկրաինայի վրա, որպեսզի կասեցնի Ուկրաինայի տնտեսության զարգացումը… Սակայն ռուսական այս որոշումն ու մյուս հետագա որոշումները արժանի պատասխան կստանան»,- խորհրդարանում հայտարարել է Յացենյուկը։
Նրա խոսքով` Կիևը վերջին երեք տարում Ռուսաստանից ունեցած կախվածությունը երեք անգամ նվազեցրել է։ «Եթե երեք տարի առաջ ուկրաինական արտադրանքի արտահանումը դեպի Ռուսաստան կազմում էր շուրջ 35 տոկոս, ապա այսօր մենք այդ կախվածությունը հասցրել ենք 12 տոկոսի»,- ասել է Յացենյուկը։
«Օրենքը, որը խնդրում ենք ընդունել, հետևյալն է` Ուկրաինայի նախարարների կաբինետը 2016 թվականի հունվարի 1-ից համարժեք միջոցներ կկիրառի Ռուսաստանի Դաշնության նկատմամբ, մենք կպաշտպանենք Ուկրաինայի ներքին շուկան»,- ասել է նա։
Ուկրաինայի խորհրդարանն ընդունել է այդ օրենքը։
