ԵՐԵՎԱՆ, 23 դեկտեմբերի — Sputnik. Ամանորի և Սուրբ ծննդյան տոների առթիվ Հայաստանի Հանրապետության նախագահ Սերժ Սարգսյանի անունից դեկտեմբերի 23-ին նախագահի նստավայրում ընդունելություն է կազմակերպվել գործարար համայնքի ներկայացուցիչների համար: Սերժ Սարգսյանը շնորհավորել է գործարարներին գալիք տոների առթիվ, բարեմաղթանքներ հղել նրանց:
Նա ամփոփել է տնտեսական տարին, խոսել է ընթացիկ տարվա տնտեսական զարգացումների, ձեռքբերումների և եկող տարվա անելիքների մասին:
«Հանքարդյունաբերություն, սննդի արտադրություն ամենալայն իմաստով՝ ներառյալ ողջ գյուղատնտեսությունը, զբոսաշրջություն, տեղեկատվական տեխնոլոգիաներ, առողջապահական և կրթական ծրագրերի արտահանում՝ սա ոչ լրիվ ցանկն է բոլոր այն ոլորտների, որոնցով թե՛ իշխանությունները, թե՛ մեր գործարար հանրությունը ջանք ու եռանդ չպետք է խնայեն նոր գաղափարների ու նոր ծրագրերի իրականացման համար: Մենք նոր հնարավորություններ ենք ստեղծել առաջ գնալու համար և միասին պետք է առավելագույնս իրականացնենք այդ հնարավորությունները»,- ասել է ՀՀ նախագահը:
