ԵՐԵՎԱՆ, 23 դեկտեմբերի-Sputnik. Երևանի քաղաքապետարանի փոխանցմամբ, համաձայն հաստատված բյուջեի, տարեկան եկամուտների ընդհանուր գումարը ծրագրվել է 78 միլիարդ 219 միլիոն 530 հազար դրամի չափով:
Sputnik ռադիոկայանը զրուցել է Երևանի քաղաքապետի տեղակալ Վահե Նիկոյանի հետ և պարզել, թե ինչ ուղղություններով են ծախսվելու բյուջետային հատկացումները:
«Երևանի 2016 թվականի բյուջեն հնարավորություն է տալու, որ կարողանանք ապահովել մայրաքաղաքի քառամյա զարգացման ծրագիրը: Հաջորդ տարի պարտադիր կերպով կառուցվելու է շախմատի 2 դպրոց: Իսկ Երևանի ենթակայության բոլոր կազմակերպությունների ջեռուցման խնդիրն ամբողջությամբ կհամարենք լուծված: Էական ուշադրություն է դարձվելու այն հարցին, որ կենդանաբանական այգին ամբողջությամբ բարեկարգվի ու վերակառուցվի: Դա ևս քառամյա ծրագրի դրույթներից է: Շարունակվելու է քաղաքացիների վերաբնակեցման ծրագիրն ու մանկապարտեզների հիմնանորոգումը»,-ներկայացնում է Վահե Նիկոյանը:
Զրուցակցի խոսքով` ամենակարևոր ծրագրերից է ճանապարհաշինությունը: Երևանը շրջանցող ճանապարհը կենտրոնը բեռնաթափելու հնարավորություն կտա: Իսկ Հրազդան գետի վրա նոր կամուրջ է կառուցվելու: Հիշեցնենք, որ Դավթաշենի կամրջից հետո Երևանում նոր կամուրջ չի կառուցվել:
