ԵՐԵՎԱՆ, 23 դեկտեմբերի- Sputnik. Ստամբուլի Սաբիհ Գեքչեն օդանավակայանի աշխատակիցներից երկուսը տուժել են ինքնաթիռների կայանման վայրում գրանցված պայթյունի հետևանքով, միջադեպի պատճառն առայժմ հայտնի չէ, չորեքշաբթի հաղորդել է Ռոյթերս գործակալությունը` հղում անելով Pegasus Airline ավիաընկերությանը։
Հաղորդագրության համաձայն, պայթյունը տեղի է ունեցել երեքշաբթի լույս չորեքշաբթի գիշերն ինքնաթիռները կայանելու գոտում։ Տուժել են երկու հավաքարարները, որոնք գտնվել են ինքնաթիռներից մեկի մոտ։
Ոստիկանությունը դիտարկում է բոլոր հնարավոր վարկածները, ներառյալ` ահաբեկչական գործողությունը։ Օդանավակայանում ուժեղացրել են անվտանգության միջոցները, դեպքի վայրում աշխատում են ոստիկանները, խստացվել է օդանավակայանի շրջանում տրանսպորտային հսկողությունը։ Նման միջոցներ են կիրառվում նաև Ստամբուլի Աթաթուրքի անվան օդանավակայանում։
Քաղաքական գիտությունների դոկտոր, Ռազմավարական պլանավորման ինստիտուտի տնօրեն, պրոֆեսոր Ալեքսանդր Գուսևը կարծում է, որ Ստամբուլի օդանավակայանում ահաբեկչական գործողություն է իրականացվել։
«Ես չեմ բացառում ահաբեկչական գործողության հավանականությունը։ Դա ահաբեկման յուրահատուկ ակտ էր, այդ թվում` ուղղված Թուրքիայի ներկա ղեկավարությանը։ Առայժմ դա չի հաստատվել, ստուգում է անցկացվում։ Բայց դրան պետք է շատ լուրջ վերաբերվել։ Չէ՞ որ «Իսլամական պետության» գրոհայինները հայտարարել են, որ ահաբեկչական գործողություններ կիրականացնեն եվրոպական պետությունների տարածքում, ԱՄՆ-ում, նրանք սպառնացել են Ռուսաստանին»,- ասել է Ալեքսանդր Գուսևը Sputnik ռադիոկայանի եթերում։
Նրա կարծիքով` պայթյունը կարող էին կազմակերպել իսլամիստները։
«ԻՊ-ի ոչ բոլոր գրոհայիններն են սերտ կապերի մեջ թուրքական ղեկավարության հետ։ Նրանք դիտարկում են թուրքական տարածքը որպես լուրջ ամրակետ` իրենց տարածքային հավակնություններն ընդլայնելու համար։ Ուստի ոչինչ չի կարելի բացառել։ Գրոհայինները ցանկանում են ցույց տալ համաշխարհային հանրությանը, որ միջազգային ահաբեկչությունը ոչնչացված չէ։ Եվ նրանց համար ամենագլխավորը խուճապ տարածելն է»,- կարծում է Գուսևը։
