ԵՐԵՎԱՆ, 23 դեկտեմբերի- Sputnik. Բաղրամյան պողոտայում տեղի ունեցած հայտնի իրադարձություններից վեց ամիս անց, երբ էլեկտրաէներգիայի սակագնի թանկացման դեմ հանդես եկող ցուցարարները փակել էին Երևանի գլխավոր պողոտաներից մեկը, իրավապահ և քննչական մարմիններն այդպես էլ չեն գտել լրագրողների նկատմամբ բռնություն կիրառած մարդկանց։ Իրավապաշտպաններն ուշադրություն են հրավիրում, որ ոստիկանության գրեթե բոլոր գործողություններն այդ օրերին արձանագրվել են լուսանկարչական ապարատներով և տեսախցիկներով, և այդ կադրերը հայտնվել են ինչպես հեռուստաէկրաններին, այնպես էլ` համացանցում։
Խոսքի ազատության պաշտպանության կոմիտեի նախագահ Աշոտ Մելիքյանն ու իրավապաշտպան, փաստաբան Արա Ղազարյանը լրագրողների հետ հանդիպմանը հիշեցրին, որ բռնություն է կիրառվել 14 լրագրողի նկատմամբ։ ԶԼՄ-ների ևս 20 ներկայացուցչի թույլ չեն տվել կատարել մասնագիտական պարտականությունները։
«Ի սկզբանե հարուցվել է ընդամենը մեկ քրեական գործ, թեև տուժած է ճանաչվել 31 լրագրող։ Սակայն վեց ամիս անց քննչական մարմինները ոչ միայն գոնե մեկ մեղավորի չեն հայտնաբերել, այլև չեն նշել նույնիսկ մեկ կասկածյալի անուն։ Եվ դա այն պայմաններում, երբ համացանցը բառացիորեն ողողված էր տեսանյութերով, որոնք ապացուցում են, թե ոստիկաններից ով է ուժ կիրառել լրագրողների նկատմամբ, կոտրել նկարահանող տեխնիկան, ձեռքերից խլել համակարգչային կրիչները»,- պատմում է Աշոտ Մելիքյանը։
Խոսքի ազատության պաշտպանության հայկական կոմիտեն հայտարարություն է տարածել, որում համապատասխան քննչական մարմիններին կոչ է արվում պատասխանատվությամբ մոտենալ վերոհիշյալ քրեական գործին։ Հայտարարության հեղինակները կարծում են, որ Հայաստանի դատախազությունը պարտավոր է ապահովել քննչական գործողությունների լիարժեք օբյեկտիվ հսկողություն։ Հայտարարությանը արդեն իսկ միացել է նաեւ ութ լրագրողական կազմակերպություն։
