ԵՐԵՎԱՆ, 23 դեկտեմբերի — Sputnik. Հայաստանի առողջապահության նախարարության գլխավոր թունաբան Միքայել Գաբրիելյանը խորհուրդ է տալիս քաղաքացիներին չչարաշահել խմիչքը, առավել ևս` մեկը մյուսին չխառնել։
«Վերջին տարիներին շատանում են ալկոհոլային թունավորումների դեպքերը, դրանք կազմում են բուժօգնության դիմածների 1/3-ը։ Պետք է խուսափել մեծ քանակությամբ խմիչք օգտագործելուց, իսկ ամենակարևորը չխառնել խմիչքները», —Sputnik Արմենիա մամուլի կենտրոնում լրագրողներին ասաց թունաբանը։
Նրա խոսքով` ոգելից խմիչքների թնդության փոփոխությունն այնքան էլ կարևոր չէ։
Թունաբանը նշեց, որ եթե նախկինում հիմնականում թունավորվում էին 20-50 տարեկան անձինք, ապա այժմ դիմում են նաև պատանիները։
Նրա խոսքով` առաջին ախտանիշը սրտխառնոցն է, ործկալը։ Այդ ախտանիշների ի հայտ գալուն պես պետք է շտապ պառկեցնել հիվանդին, եթե նա գիտակից վիճակում է, լվացումներ անել, մաքրել ստամոքսն ու ուղարկել քնելու։
Նա հանգստացրեց, որ խանութներում վաճառվող օղին` անկախ որակից, անվնաս է, և այն կարելի է հանգիստ օգտագործել։
Թունաբանը ուշադրություն հրավիրեց բոտուլիզմի դեպքերին, որը համարվում է ծանր թունավորում։ Նա խորհուրդ տվեց պահածոյացված բանջարեղենն օգտագործելուց առաջ եռացնել նվազագույնը 30-40 րոպե։
«Այս տարի բոտուլիզմի արդեն 12 դեպք է գրանցվել` անցած տարվա 8-ի դիմաց։ Օրինակ` մեկ շաբաթ առաջ մարդիկ թունավորվել էին կարմիր պղպեղից», — ասաց Գաբրիելյանը։
Այս տարվա ցուցանիշներով` «Արմենիա» բժշկական կենտրոն դիմած սուր թունավորումներով հիվանդների թիվը 930 է կազմել` անցյալ տարվա 912-ի դիմաց։
Թունաբանը նաև կոչ արեց քաղաքացներին գնումների ժամանակ անպայման ուշադրություն դարձնել ապրանքների պահպանման ժամկետին։
