ԵՐԵՎԱՆ, 22 դեկտեմբերի– Sputnik. Նոր Սահմանադրության` դեկտեմբերի 21–ին ուժի մեջ մտած առաջին չորս գլուխները ենթադրում են փոփոխություններ պետական կազմակերպման ձևում, Sputnik Արմենիա ռադիոյի եթերում ասաց ՀՅ Դաշնակցությունից պատգամավոր Արծվիկ Մինասյանը։
«Ուժի մեջ է մտնում չորս գլուխ, որոնցից առաջինը վերաբերում է պետական կազմակերպման ձևին, ինչպես նաև այն արժեհամակարգին, որն ընկած է պետության հիմքում։ Դա ոչ միայն սոցիալական, իրավական և ժողովրդավարական պետությունն է, այլև տնտեսական կարգի հիմունքները, որոնք ենթադրում են շուկայական սոցիալական հարաբերություններ, պետական քաղաքականություն` ուղղված սոցիալական հավասարությանը»,– ասաց Մինասյանը։
Նրա խոսքով` Սահմանադրության առաջին գլխի մեկ այլ փոփոխություն կլինի ընտանիքի ինստիտուտի պաշտպանությունը։
«Սահմանադրությունում առաջին անգամ ընտանիքն ամրագրվում է որպես ժողովրդի վերարտադրության կարևոր տարր»,– ասաց Մինասյանը։
Նա նշեց, որ երկրորդ և երրորդ գլուխները վերաբերում են մարդու և քաղաքացու հիմնական իրավունքներին։
«Հատկապես կարևոր է երկրորդ գլուխը, որտեղ քաղաքացիական և քաղաքական իրավունքները չեն կարող սահմանափակվել ոչ մի վարչական մարմնի կամ կառույցի կողմից, եթե դա չի նախատեսվում Սահմանադրությամբ»,– ասաց Մինասյանը։
Նրա խոսքով` այդ նորմերը չեն կարող միանգամից ուժի մեջ մտնել, սակայն պետությունը պետք է ղեկավարվի արդեն փոփոխված կետերով։
Ինչ վերաբերում է չորրորդ գլխին, պատգամավորը նշեց, որ այն վերաբերում է տեղական ինքնակառավարման մարմիններին։ Նրա խոսքով` ընտրությունների մասին նոր օրենքի ուժի մեջ մտնելուց հետո տեղական իշխանությունները կընտրվեն 5 տարով, և հնարավոր կլինի ոչ ուղիղ քվեարկությունը։
Մինասյանը նշեց, որ նոր Սահմանադրությունն ամբողջությամբ ուժի մեջ կմտնի 4 փուլով, որոնցից վերջինը կսկսի գործել 2018թ.–ի ապրիլից։
Դեկտեմբերի 6-ին կայացած Սահմանադրական փոփոխություններին «այո» է քվեարկել մասնակիցների 63.37%-ը կամ 825.521 ընտրող, «ոչ» է ասել մասնակիցների 32.36% կամ 421.568 ընտրող:
