ԵՐԵՎԱՆ, 22 դեկտեմբերի– Sputnik. Երևանում 2017թ.–ին Հայաստանի և նրա հարևանների միջմշակութային երկխոսության խոշոր նախագիծ կիրականացվի, Sputnik Արմենիային հաղորդեց «Մշակույթների երկխոսություն» կազմակերպության նախագահ Սոնա Հարությունյանը։
«Նախագծի մանրամասները կներկայացվեն 2016թ.–ի մայիսին, այժմ բանակցություններ են ընթանում, և մշակվում է ծրագիր»,– ասաց նա։
Հարությունյանն ակնկալում է, որ 2016թ.–ը ոչ միայն հետաքրքիր կլինի, այլև հագեցած մշակութային իրադարձություններով։ Սպասվում են մի շարք միջոցառումներ` նվիրված ինչպես Հայաստանի անկախության 25–ամյակին, այնպես էլ Օսմանյան կայսրությունում Հայոց ցեղասպանության 100–րդ տարելիցին։
«2016թ.–ի ապրիլի 24–ին Ուբերլինգենում (Գերմանիա) տեղի կունենա «Հայաստանը երեկ և այսօր. արվեստ և լուսանկարչություն» անունով ցուցահանդես, որի շրջանակում Հայաստանից կներկայացվեն չորս գեղանկարիչների` Կամո Նիգարյանի, Վազգեն Բաժբեուկ-Մելիքյանի, Նարեկ Ավետիսյանի, Օվսաննա Շեկոյանի, ինչպես նաև լուսանկարիչ Գագիկ Հարությունյանի աշխատանքները»,– Sputnik Արմենիա մամուլի կենտրոնում տեղի ունեցած ասուլիսում ասաց նա։
2016թ.–ի սեպտեմբերին Երևան կժամանի գերմանացի արվեստագետ Յուրգեն Միդելմանը։ Ենթադրվում է, որ նրա այցի շրջանակում կիրագործվի համատեղ նախագիծ-ցուցահանդես Նարեկ Ավետիսյանի հետ։
Նախապատրաստվում է նաև հայաստանյան գեղարվեստական լուսանկարչության կարևոր ներկայացուցիչ Գագիկ Հարությունյանի աշխատանքների ցուցահանդեսը` նվիրված Հայաստանի անկախության 25–ամյակին։ Նկարիչն ունի նաև աշխատանքներ` նվիրված 1988թ.–ի երկրաշարժին և ղարաբաղյան հակամարտությանը։
«Մշակույթների երկխոսությունը» 2015թ.–ը համարում է բեղմնավոր, քանի որ 11 ծրագրերից 8–ն իրագործվել է Եվրոպայում։
Թեև կազմակերպությունը համատեղ նախագծեր է իրականացնում Ավստրիայի, Ֆրանսիայի, Էստոնիայի հետ, այդուհանդերձ առավել սերտ համագործակցություն է հաստատվել Գերմանիայի հետ։ Ինչպես Sputnik Արմենիային պարզաբանեց կազմակերպության տնօրենը, դրան նպաստում են ինչպես անձնական կապերը, այնպես էլ այն, որ Գերմանիան այսօր ժամանակակից արվեստի կենտրոն է։
Դեռևս 20–րդ դարում բարդ էր պատկերացնել, որ Փարիզին կփոխարինի Բեռլինը, չէ՞ որ մինչև հիմա կարծիք կա, որ Փարիզը մշակույթի կենտրոն է։ Այդ նորությունը կզարմացներ շատ գրողների, արվեստի գործիչների, որոնք մեկնել են Փարիզ` ներշնչանք գտնելու։
«Մշակույթների երկխոսություն» կազմակերպության նպատակն է աշխարհին ներկայացնել հայաստանաբնակ արվեստի գործիչներին, արտերկրում գործող հայաստանցի անվանի արվեստագետներին։ Կազմակերպությունը որոնում և բացահայտում է ժամանակակից արվեստի նոր տաղանդներ։
«Մեզ համար նման բացահայտումներից էր Տիգրան Կիրակոսյանը, ով լուռ աշխատում է իր արվեստանոցում։ Ինչ–որ բան մեզ հուշեց, որ նրա մեջ թաքնված է տաղանդի ուժ և հզորություն»,– ասաց Հարությունյանը։
