ԵՐԵՎԱՆ, 22 դեկտեմբերի — Sputnik. Ադրբեջանն իրավիճակը հասցրել է նրան, որ զորամասերում չի մնացել մի զենք, մի միջոց, որը չի կիրառել: Այդ մասին լրագրողների հետ հանդիպման ժամանակ ասաց Հայաստանի պաշտպանության նախարարի մամուլի քարտուղար Արծրուն Հովհաննիսյանը:
Ըստ նրա, հայկական կողմը նույն պատասխանը չի տալիս հակառակորդին, որովհետև դա պարտադիր չէ` կարելի է պատասխանել ավելի փոքր ծավալով, բայց ավելի ճշգրիտ:
Անդրադառնալով վերջին շրջանում սահմանային իրավիճակի լարմանը՝ Արծրուն Հովհաննիսյանը մի քանի պատճառ ներկայացրեց.
«Պատճառներից մեկը երկու երկրների նախագահների հանդիպումը կարող էր լինել, ինչպես նաև Ադրբեջանում ստեղծված ներքաղաքական, տնտեսական իրավիճակը»,- ասաց Արծրուն Հովհաննիսյանը:
ՀՀ ՊՆ մամուլի քարտուղարը հայտարարեց, որ այն, ինչ կատարվում է այսօր, հրադադարի խախտում չէ, այլ` պատերազմ։ Սակայն նա նաև ավելացրեց, որ այժմ սահմանին և շփման գծում իրավիճակը համեմատաբար հանգիստ է:
